Loading ...
Prodhuesi më i madh i makinave në Britani, Jaguar Land Rover (JLR), ka njoftuar zgjatjen e mbylljes së fabrikave të tij në shkallë globale deri më 1 tetor, si pasojë e një sulmi të madh kibernetik që ndodhi më 31 gusht.
Ky vendim pritet t’i kushtojë kompanisë dhjetëra miliona paund në ditë për shkak të humbjes së të ardhurave, ndërkohë që rrezikon mijëra vende pune në zinxhirin e furnizimit dhe nxit shqetësime për cenueshmërinë e industrisë britanike ndaj sulmeve kibernetike.
Në Britani, mbi 33,000 punonjës janë të punësuar drejtpërdrejt nga JLR, shumica në fabrikat e Solihull në West Midlands dhe Halewood në Merseyside. Por ndikimi është edhe më i madh në zinxhirin e furnizimit, ku rreth 200,000 persona punojnë për kompani që furnizojnë JLR.
Shumë prej këtyre furnitorëve u detyruan të mbyllin menjëherë aktivitetin, për shkak të modelit “just-in-time” të prodhimit që përdor industria e makinave. Deri tani, rreth 25% e furnitorëve kanë pezulluar prodhimin dhe kanë nisur pushimin e punëtorëve, duke përdorur metoda si “banking hours”, ku orët e humbura do të duhet të rikuperohen më vonë.
Përveç Britanisë, JLR është detyruar të ndalojë prodhimin edhe në fabrikat e saj në Kinë, Sllovaki, Indi dhe Brazil, pasi sistemet IT janë paralizuar nga sulmi.
Në disa fabrika, si ajo e Solihull, janë ruajtur vetëm ekipe minimale për punë mirëmbajtjeje, përfshirë edhe punë të thjeshta si lyerja e dyshemeve, ndërsa linjat e prodhimit mbeten të mbyllura.
Sindikata dhe grupet e industrisë po i bëjnë thirrje qeverisë britanike të shqyrtojë skema të mbështetjes financiare, të ngjashme me skemat e pagesës së pushimeve gjatë pandemisë. Megjithatë, duke pasur parasysh se JLR realizoi fitime prej 2.2 miliardë paund vitin e kaluar, shumë presin që vetë kompania të marrë përgjegjësi për mbështetjen e furnitorëve të saj.
Shoqata e Prodhuesve dhe Tregtarëve të Automjeteve (SMMT) deklaroi se ndihma shtetërore duhet të jetë alternativa e fundit, por nuk duhet përjashtuar. / abcnews.al /
