Loading ...Komisioni për Integrimin Evropian, i cili në fillim i takonte Partisë Demokratike, i është kaluar sërish Partisë Socialiste. Nga 11 komisione parlamentare, 7 tashmë kontrollohen nga PS dhe vetëm 4 nga PD, çka ka nxitur reagime të ndryshme në emisionin “Real Story” në ABC News.
Gazetarja Erneta Shevroja theksoi se situata në Parlament nuk sjell risi dhe se roli i opozitës në komision ka qenë më shumë simbolikë:
“Nuk kemi parë asgjë të re. Parlamenti u mbyll dhe u hap me të njëjtat skema dhe të njëjtat fytyra. Nuk do të ndodhë një diferencë e madhe nëse e drejton një i PS apo një i PD. PD ka qenë një simbolikë, vërtet opozita vinte dhe largohej, roli i opozitës në atë Komisionin e Integrimit ka qenë më shumë simbolikë. Të dyja palët e duan këtë integrim dhe e duan këtë proces, se sa të bëhen pengesë”, tha gazetarja.
Ndërkohë, Indrit Hoxha, anëtar i kryesisë së PD-së, u shpreh se debati për drejtimin e komisionit është periferik në krahasim me rëndësinë reale të integrimit:
“Anëtari i kryesisë së PD, Indrit Hoxha: Është koha që Shqipëria të anëtarësohet në BE. Kemi humbur shumë kohë, për shkak edhe të PS edhe të PD. Në pikën që jemi sot më duket një diskutim shumë i parëndësishëm se kush e drejton atë komision, kur vjen çështja për integrimin e vendit në BE. Sepse merita e Shqipërisë në BE nuk duhet të jetë vetëm meritë e PD apo e PS. Ne e dimë që Rama është mjeshtër i PR dhe i propagandës. Por, forcat politike në vend kanë rëndësinë e tyre”, tha Hoxha.
