Loading ...
Ristrukturimi korporativ i OpenAI pritet të shtyhet për në vitin e ardhshëm, pasi kompania që qëndron pas ChatGPT është ende në negociata për termat kyç të marrëdhënies së saj të ardhshme me Microsoft, çka po ndërlikon planet për të mbledhur miliarda dollarë të tjerë në financim.
Kjo kompani e inteligjencës artificiale, që vlerësohet në 300 miliardë dollarë, është përfshirë në bisedime të ndërlikuara me gjigantin e softuerëve, njëkohësisht mbështetësin e saj më të madh, për të rishkruar një kontratë komerciale ekzistuese që është e vlefshme deri në vitin 2030.
Një marrëveshje do t’i mundësonte OpenAI të finalizonte ristrukturimin, duke i lejuar investitorët të zotërojnë kapital në kompani dhe të hapte rrugën për një IPO (dalje në bursë). Megjithatë, disa burime pranë bisedimeve thonë se ka ende mospajtime të mëdha mes palëve për çështje kyçe, që mund të shtyjnë negociatat përtej datës 31 dhjetor.
Dështimi për të arritur një marrëveshje deri në atë datë do t’i jepte SoftBank të drejtën të mos përmbushë angazhimin e saj prej 10 miliardë dollarësh ndaj kompanisë, sipas kushteve të investimit të grupit japonez. Një situatë e tillë do të dëmtonte përpjekjet e OpenAI për të mbledhur kapital të ri./abcnews.al
