Në fillim Champions, më pas sfida për titullin në Serinë A. Inter ka në program dy sfida të mëdha deri në fund të javës. E para ajo e mbrëmjes së sotme në “San Siro” kundër Arsenal, që në rast suksesi do të rriste kuotat e zikaltërve në zonën e kualifikimit direkt.
Skuadra e Simone Inzagit ka shtatë pikë pas tre ndeshjeve të para, por duhet të mendojë edhe për të ruajtur energjitë për përballjen direkte të së dielës kundër Napolit.
Sërish jashtë Kristjan Asllani, ndërsa zikaltërit do të kenë një rotacion në formacion. Taremi pritet të marrë vendin e Turam në sulm, ndërsa Fratessi dhe Zilinski pritet të nisen sërish titullarë në mesfushë.
Nuk qëndron pas në renditje dhe pretendime Arsenal, që kërkon të kthehet te suksesi, pas goditjes së rëndë që mori në fundjavën e Premier Ligë. Mikel Arteta nuk do të ketë në dispozicion Deklan Rice, por pas dy muajsh kthehet i gatshëm kapiteni Martin Odegard.
Mbrëmja e së mërkurës në Champions League zbret në fushë edhe disa prej favoritëve të tjerë.
Bayern Munich kërkon të kthehet te fitorja në këtë turne pas dy humbjeve radhazi, ndërsa bavarezët do të presin në shtëpi një rival aspak të lehtë si Benfika.
Pavlovic dhe Stanisic janë dy mungesat e rëndësishme për Vincent Kompany, I cili e di mirë që nuk I lejohen më hapa fals në Champions.
Barcelona ka në letër një ndeshje të lehtë, pasi duhet të luajë në Beograd kundër Crvena Zvezda. Kryesuesit e La Liga vijnë në këtë sfidë pa mungesa dhe me moralin lart pas një ecurie spektakolare në këtë sezon.
Një tjetër sfidë e madhe në mbrëmjen e Champions League është ajo në “Parc de Prince”, ku Paris Sent Zhërmen do të presë një rival të fortë dhe të bezdishëm si Atletico Madrid.
Kampionët francezë kërkojnë me çdo kusht fitoren për të larguar fantazmat e një tjetër dështimi në Europë, pasi në dy ndeshjet e fundit kanë regjistruar një humbje dhe një barazim. I njëjti diskutim edhe për skuadrën e Cholo Simeone, që nuk po jeton një Champions të lumtur, me dy humbje radhazi në sfidat e fundit. /i.m /abcnews.al
