Një ditë më parë u mbajtën zgjedhjet lokale në Guci të Malit të Zi. Dy listat shqiptare fituan 9 mandate, Forumi Shqiptar 7 mandate ndërsa Lista për Guci dy mandate.
Nënkryetari Edon Balidemaj, në një intervistë për “Ballkan Update”, i bëri thirrje Listës për Guci për t’u bashkuar në mënyrë që të ketë një kryetar shqiptar.
“Publikisht po i kërkojmë listës tjetër, Lëvizjes për Guci, që të shkojmë si bllok dhe të kërkojmë kryetarin e komunës të paktën një gjysmë mandati, dy vite, meqë e dini se kryetari i komunës në sistemin zgjedhor zgjidhet nga parlamenti lokal. Nëse ne insistojmë të marrim kryetarin, listat e tjera nuk kanë rrugëdalje tjetër përpos pranimit të kësaj kërkese meqë koalicioni që ka fituar 14 nuk kanë thirrje që të shkojnë me partinë e ish presidentit Gjukanoviç.
Kemi rastin ideal që të marrin pozitën kyçe në komunën e Gucisë. Mbrëmë kanë dalë rezultatet e para, presim që të dalin përfundimtaret dhe të nisim procesin e bisedimeve. Nuk kemi vija të kuqe me asnjë subjekt në Guci dhe presim që gjatë bisedimeve t’i shpalosim premtimet që kemi pasur gjatë fushatës.“, u shpreh ai./abcnews.al
