Nëpunësit publik kanë dënuar qeverinë australiane për “bashkëfajësi” në gjenocidin ndaj palestinezëve, duke kërkuar që Canberra të “ndalojë menjëherë” të gjitha eksportet ushtarake në Izrael.
Në një letër publike drejtuar kryeministrit, mbi 350 punonjës qeveritarë kanë shprehur “shqetësim të thellë” se kryeministri Anthony Albanese “po e udhëheq Australinë për t’u bërë bashkëfajtor në një gjenocid shtesë, në një projekt shtesë kolonial, duke e njollosur këtë komb me më shumë krime lufte”.
Nëpunësit publik protestues janë të punësuar në qeveritë lokale, shtetërore dhe federale. “Këto krime lufte janë sërish në shërbim të fuqive të huaja”, thuhet në letër. Kërkesa publike vjen një ditë pasi ligjvënësit në parlamentin federal australian bllokuan një mocion për të njohur zyrtarisht një shtet të pavarur palestinez.
“Ne ju shkruajmë nga toka e vjedhur, tokë që nuk u dorëzua kurrë nga popujt e Kombeve të Parë që janë ende të angazhuar në luftën për çlirim. Ne i bëjmë thirrje qeverisë australiane që të ndërmarrë veprime të shpejta dhe vendimtare për t’i dhënë fund mbështetjes së saj për gjenocidin, spastrimin etnik dhe pushtimit të paligjshëm të Palestinës duke ndërprerë menjëherë të gjitha eksportet ushtarake në Izrael”, thotë letra duke iu drejtua kryeministrit Albanese.
Letra përmend se termi “Izrael” i referohet “shtetit kolon që ka kryer gjenocid në Palestinën historike që nga viti 1948”. Nëpunësit publik kishin frikë se Canberra “tani mund të jetë duke shkelur ligjin ndërkombëtar dhe bashkëpunëtor në luftën kriminale”.
“Zyrtarët shtetërorë që dështojnë të ndalojnë eksportimin e armëve ose municioneve në Izrael mund të jenë penalisht përgjegjës për ndihmën dhe nxitjen e krimeve të luftës, krimeve kundër njerëzimit dhe akteve të gjenocidit”, thuhet në letër, duke cituar paralajmërimet e Komisionerit të Lartë të OKB-së për të Drejtat e Njeriut.
– Mbështetja e armëve e Australisë për Izraelin
Duke iu referuar vrasjes së të paktën 36.170 palestinezëve në Gaza nga Izraeli që nga 7 tetori, letra theksoi se civilët palestinezë janë “masakruar me pjesë të prodhuara në Australi dhe me mbështetjen e inteligjencës australiane”.
“Bombat që vrasin dhe gjymtojnë një popullsi që është gati 80 për qind refugjatë dhe gati 50 për qind fëmijë, hidhen nga avionët luftarakë F-35 me pjesë të prodhuara ekskluzivisht në Australi. Droni që vrau Zomi Frankcom-in është prodhuar nga Elbit Systems, kompania për të cilën Australia akordoi afër 1 miliard dollarë fonde publike në shkurt të vitit 2024”, thuhet në letër.
Letra kujton se Australia ka lëshuar mbi 350 leje eksporti ushtarak në Izrael që nga viti 2017.
“Të dhënat e reja zbulojnë se Australia gjatë mizorive aktuale ka rritur eksportet e saj të armëve në Izrael. Baza e mbikëqyrjes Pine Gap, e kontrolluar nga SHBA-ja dhe e organizuar nga Australia pranë Alice Springs, furnizon inteligjencën nga Palestina për ushtrinë izraelite”, thanë nëpunësit publik, duke cituar shifra zyrtare.
Nëpunësit publik dyfishuan kërkesën e tyre që qeveria e kryeministrit Albanese të ndërpresë menjëherë furnizimin me të gjitha pjesët ushtarake dhe armët për Izraelin, përfshirë komponentët e zinxhirit të furnizimit të avionëve F-35, si dhe të vendosë një embargo të dyanshme të armëve ndaj Izraelit.
Përveç kësaj, theksoi letra, Canberra duhet të pushojë së ofruari mbështetje zbuluese nga objekti Pine Gap, nga i cili SHBA-ja ndan të dhëna mbikëqyrjeje me Izraelin.
Ajo i kërkoi qeverisë australiane të “anulojë të gjitha kontratat dhe bashkëpunimin me furnizuesit izraelitë të armëve, përfshirë kontratën e saj prej 917 milionë dollarësh me Elbit Systems për furnizimin e komponentëve për automjetet luftarake të këmbësorisë Redback”.
