Trajneri i Liverpoolit, Jurgen Klopp, ka folur para sfidës ndaj Manchester City, që do të luhet të dielën. Strategu gjerman e di shumë mirë rëndësinë e kësaj sfide, madje e ka konsideruar si klasiken e futbollit anglez. Në fjalën e tij para medieve, Klopp tha:
RIVALITETI – “Unë kam ardhur para katër vitesh në Angli dhe e di se më parë ka pasur skuadra të tjera që rivalizonin për titull. Por vitet e fundit, vetëm ne dhe Manchester City kemi ruajtur vendet e para. Po, mund ta them me plot bindje se rivaliteti mes dy skuadrave po rritet dhe mund ta quajmë si klasiken e futbollit anglez”.
VAN DIJK – “Nuk ka asnjë problem fizik. Dje nuk ka qenë në stërvitje për disa arsye personale, por është në gjendje perfekte për të luajtur. Kemi disa mungesa të tjera, Shaqiri dhe Clyne nuk do të jenë të gatshëm”.
STRATEGJIA – “Nuk mund të luash gjatë gjithë kohës në sulm kundër Manchester City. Megjithatë, po nuk luajte me kurajo përballë ekipeve të Guardiolës, turpërohesh. Ne jemi përballur disa herë dhe do të jetë e vështirë të befasojmë njëri-tjetrin”./abcnews.al
