Loading ...
Në javën që nga fillimi i tërheqjes së një serie suplementesh mjekësore japoneze, pesë persona kanë vdekur dhe më shumë se 100 njerëz janë shtruar në spital deri më tani, raporton Associated Press (AP).
Kompania Kobayashi Pharmaceutical nga Osaka u kritikua pasi nuk doli menjëherë publike me problemet që njiheshin brenda kompanisë në janar dhe bëri njoftimin e parë publik për të vetëm më 22 mars.
Zyrtarët e kompanisë thanë se 114 njerëz u trajtuan në spitale pasi morën produktet, duke përfshirë “Benikoji choleste help”, i cili synon të ulë kolesterolin dhe përmban një përbërës të quajtur ‘benikoji’, një lloj myku i kuq.
Në fillim të kësaj jave, dy persona vdiqën pas marrjes së produktit. Disa njerëz kanë zhvilluar probleme me veshkat, por shkaku i saktë është ende duke u hetuar në bashkëpunim me laboratorët qeveritarë, tha prodhuesi.
“Ne kërkojmë ndjesë thellësisht”, u tha gazetarëve këtë të premte presidenti Akihiro Kobayashi, duke u përkulur për një kohë të gjatë për të shprehur faljen e tij së bashku me tre zyrtarë të tjerë të lartë të kompanisë, shkruan AP. Ai shprehu keqardhjen për ata që vdiqën dhe u sëmurën, si dhe për familjet e tyre.
Ai gjithashtu kërkoi falje për telashet e shkaktuara në të gjithë industrinë e ushqimit shëndetësor dhe profesionit mjekësor, duke shtuar se kompania po punon për parandalimin e dëmeve të mëtejshme dhe përmirësimin e menaxhimit të krizave./abcnews.al
