Bashkimi Europian po përgatitet të vendosë tarifa për importet e grurit nga Rusia dhe Bjellorusia për të “qetësuar” fermerët dhe vendet anëtare, raportoi të martën Financial Times, duke cituar burime që kanë njohuri në lidhje me planin.
Komisioni Europian pritet në ditët në vijim të vendosë një tarifë prej 95 € për ton për drithërat nga Rusia dhe Bjellorusia, raportoi FT, duke shtuar se tarifa prej 50% do të vendoset gjithashtu për farat vajore dhe produktet e derivuara.
Masa vjen pasi fermerët në të gjithë Bashkimin Europian po bëjnë thirrje për ndryshime në kufizimet e vendosura ndaj tyre nga Marrëveshja e Gjelbër për të trajtuar ndryshimet klimatike dhe rivendosjen e tarifave për importet bujqësore nga Ukraina, të cilat u hoqën pas pushtimit të Rusisë në 2022.
Fermerët nga Polonia, Hungaria dhe Sllovakia, të cilët janë të gjithë anëtarë të BE-së, pretendojnë se masa ka dëmtuar prodhimin e tyre. Polonia, si vendet e tjera të BE-së, ka shënuar protesta masive gjatë javëve të fundit, ndërsa fermerët po protestojnë kundër rregulloreve të saj mjedisore.
Kryeministri polak Donald Tusk ka kërkuar gjithashtu ndalimin e importeve të produkteve bujqësore ruse dhe bjelloruse në BE.
/abcnews.al
