Arturo Vidal e ka të qartë të ardhmen e tij. Mesfushori kilian nuk po aktivizohet shumë te Barcelona dhe është gati të largohet në janar. 32-vjeçari numëron vetëm 248 minuta aktivizim në kampionat, ku ka shënuar tre gola dhe 49 minuta aktivizim në Champions League.
Së fundi ka ardhur një ofertë tunduese nga Kina në drejtim të tij. Fcinternews.it raporton se Shanghai SIPG i ka ofruar Vidalit një kontratë dy-vjeçare me një rrogë neto prej 10 milionë eurosh në sezon.
“Luftëtari” i mesfushës e ka refuzuar. Shkaku? Dëshira e tij e madhe quhet Inter dhe lojtari latin kërkon me çdo kusht transferimin tek ekipi i Antonio Contes. Të dy kanë punuar bashkë te Juventusi dhe janë gati ta bëjnë sërish të njëjtën gjë me ekipin zikaltër.
Vidal e ka dhënë sinjalin, tani pritet reagimi i Interit. Klubi italian po negocion me Barcelonën dhe shpreson që të gjejë sa më shpejt akordin përfundimtar. /abcnews.al
