Disa ditë pasi Papa Françesku bëri thirrje që Ukraina të valëvisë “flamurin e bardhë” dhe të negociojë me Rusinë, Vatikani të martën u tërhoq dhe i kërkoi Moskës që së pari të ndalojë pushtimin e saj “të padrejtë”.
Kardinali Pietro Parolin, sekretari i shtetit i Vatikanit dhe zyrtari i dytë më i lartë pas Françeskut, tha për Corriere della Sera se Rusia “para së gjithash duhet të pushojë zjarrin”, duke e quajtur vendin “agresor” dhe luftën në Ukrainë “të padrejtë”.
“Lufta e nisur kundër Ukrainës nuk është efekt i një fatkeqësie natyrore të pakontrollueshme, por vetëm i lirisë njerëzore, dhe i njëjti vullnet njerëzor që shkaktoi këtë tragjedi ka gjithashtu mundësinë dhe përgjegjësinë për të ndërmarrë hapa për t’i dhënë fund dhe për t’i hapur rrugën një zgjidhje diplomatike”, tha ai.
Sqarimi erdhi pasi Françesku u pyet në një intervistë për transmetuesin publik zviceran, ku u shpreh se “ata që kanë guximin për të ngritur flamurin e bardhë dhe për të negociuar janë më të fortë.”
Komentet e tij shkaktuan zemërim në Kiev. Presidenti ukrainas Volodymyr Zelenskyy tha në një deklaratë se është Rusia “ajo që duhet të ndalet që lufta të përfundojë”, dhe ministri i Jashtëm Dmytro Kuleba deklaroi se Ukraina “nuk do të ngrejë kurrë asnjë flamur tjetër” përveç atij kombëtar.
Aleatët e Ukrainës gjithashtu reaguan. Ministrja e Jashtme gjermane, Annalena Baerbock që deklaroi se “nuk i kuptoi” komentet e papës dhe presidenti letonez Edgars Rinkēvičs tha: “Nuk duhet të kapitullohet përballë së keqes, duhet luftuar atë dhe mposhtur atë, kështu që se e keqja ngre flamurin e bardhë dhe kapitullon”./abcnews.al
