Feronikeli ka mbyllur sot bashkëpunimin me trajnerin Dejan Vukicevic. Divorcin me trajnerin e ka konfirmuar dhe vetë klubi i IPKO Superligës, pasi në faqen e tyre zyrtare, shkruan: “Trajneri, Dejan Vukicevic dhe FC Feronikeli kanë ndërprerë bashkëpunimin.
Pas një bisede të trajnerit, Vukicevic dhe Presidentit të klubit, Naser Ramaj, që të dy janë dakorduar që të ndërpritet bashkëpunimi, që do të thotë se Vukicevic nuk do të jetë më trajner i FC Feronikelit. Është e dukshme që klubi po kalon në një fazë jo të mirë dhe se ndryshimet ishin të nevojshme, prandaj edhe erdhi deri te kjo ndërprerje e bashkëpunimit.
Sidoqoftë, FC Feronikeli falënderon trajnerin, Dejan Vukicevic, për punën dhe profesionalizmin e treguar deri në ditën e tij të fundit si trajner i klubit. FC Feronikeli do të njoftojë me kohë për pasuesin e trajnerit, Vukicevic.”
Siç ka mësuar ABC News, trajneri i ri i tre herë kampionëve të Kosovës do të jetë Albert Bunjaki. Strategu 48-vjeçar ka drejtuar më parë edhe përfaqësuesen e Kosovës dhe ka një CV të pasur në karrierën e tij si trajner. Bunjaki do të ketë detyrën e vështirë të rikthejë Feronikeli te rezultatet pozitive dhe në vendet e para të renditjes./abcnews.al
