Presidentja e Komisionit Evropian, Ursula von der Leyen tha se një anije me ndihma humanitare do të niset sot për në Gaza.
Anija, e cila i përket organizatës bamirëse të Spanjës Open Arms do të bëjë një udhëtim pilot për të testuar korridorin detar të shpallur së fundmi. Anija ka pritur në portin e Qipros të Larnakës për leje për të ofruar ndihma ushqimore nga World Central Kitchen, një organizatë bamirëse amerikane e themeluar nga kuzhinieri i famshëm Jose Andres, shtoi ajo.
Von der Leyen tha se BE, së bashku me SHBA-në, Emiratet e Bashkuara Arabe dhe vende të tjera partnere të përfshira po nisnin korridorin detar për të ofruar sasi të mëdha ndihme.
Përpjekjet për të rritur në mënyrë dramatike dërgesat kanë sinjalizuar zhgënjim në rritje në të gjithë Evropën dhe Shtetet e Bashkuara me sjelljen e Izraelit në luftë.
Kujtojmë se të enjten, presidenti i SHBA Joe Biden njoftoi një plan për të hapur një port në det të hapur për të ndihmuar në dhënien e ndihmës.
Izraeli akuzon Hamasin për komandimin e disa dërgesave të ndihmave. /abcnews.al
