Gjermania ka ndaluar eksportet e armëve në Turqi. Kjo masë vjen si kundërpërgjigje ndaj ofensivës që Ankaraja ka nisur kundër Njësive kurde të Mbrojtjes së Popullit në verilindje të Sirisë, tha sot një zëdhënëse e Ministrisë së Jashtme gjermane.
Turqia ka nisur një operacion ushtarak në Siri, disa ditë pasi Shtetet e Bashkuara tërhoqën trupat nga zona kufitare.
Veprimet e Turqisë janë ndeshur me kritika të fuqishme nga komuniteti ndërkombëtar dhe SHBA-ja, por edhe Bashkimi Evropian kanë kërcënuar me sanksione Ankaranë.
“Për shkak të ofensivës ushtarake turke… Qeveria e Gjermanisë nuk do të lëshojë asnjë leje të re për të gjitha pajisjet ushtarake që të mund të përdoren nga Turqia në Siri”, tha ministri i Jashtëm Heiko Maas, sipas një zëdhënësi.
Një ditë më parë, ministrja e Mbrojtjes, Annagret Kramp-Karrenbauer tha se Gjermania pret që të gjithë partnerët e NATO-s – përfshirë edhe Turqinë – të kontribuojnë në stabilitetin e rajonit.
Gjermania gjatë vitit 2018 kishte eksportuar armë në Turqi në vlerë prej 243 milionë eurosh. Vetëm gjatë katër muajve të parë të vitit 32019, Turqia kishte pranuar armë nga Gjermania në vlerë prej 184 milionë eurosh, ka raportuar sot gazeta gjermane Bild Am Sonntag.
Dispozita e ashpër e marrë nga qeveria e Berlinit nuk është embargoja e parë ushtarake e pësuar nga Erdogan. Që nga fillimi i ofensivës kundër Sirisë, katër shtete të tjera kanë bllokuar tashmë eksportin e materialit të luftës. Të parët që dënuan aksionin turk ishin Finlanda, Norvegjia dhe Danimarka.
Në vazhdën e vendeve skandinave, Hollanda gjithashtu pezulloi shitjen e armëve pas sulmit ndaj popullatës kurde. Vendimi u komunikua nga Zëvendëskryeministri Hollandez, Hugo de Jonge. Qarkullimi i Amsterdamit me Turqinë në sektorin e armëve është rreth 30 milion euro në vit.
Por ofensiva e Ankarasë nuk ka të bëjë vetëm me Sirinë: ministrat e jashtëm të vendeve të Lidhjes Arabe, pas një takimi urgjent, lëshuan një dokument që dënonte ofensivën turke dhe duke e quajtur atë “një kërcënim për sigurinë kombëtare arabe, si dhe për paqen dhe sigurinë ndërkombëtare “. Lidhja Arabe gjithashtu ka treguar se ata do të marrin “masa urgjente për të trajtuar agresionin kundër Sirisë, përfshirë uljen e marrëdhënieve diplomatike dhe ndërprerjen e bashkëpunimit ushtarak”. /abcnews.al
