Punëtorët e seksit në lagjen e “dritës së kuqe” të Amsterdamit po protestojnë kundër planeve për të zhvendosur distriktin në një “qendër seksi” e cila do të vendoset jashtë qytetit. Dhjetra njerëz, shumë të veshur me maska për të fshehur identitetin e tyre, demonstruan dje pranë bashkisë.
Kryetarja e bashkisë, Femke Halsema dëshiron të zhvendosë qarkun në fjalë (i njohur si De Walen) jashtë qendrës së qytetit, me synimin për të reduktuar numrin e turistëve si dhe shkallën e krimeve të vogla në zonë. Vetë ajo ka deklaruar prej kohësh kundërshtimin e saj ndaj ekzistencës së këtij rrethi ku punonjëset e seksit qëndrojnë në vitrinat e dyqaneve në pritje të klientëve të mundshëm.
“Qëllimi është kryesisht për të luftuar mbipopullimin në De Wallen,” tha Halsema për planet e lëvizjes. Këshilli i qytetit ka identifikuar tre lokacione të mundshme për ambientin e ri i cili do të ketë 100 dhoma.
Megjithatë, një punëtore seksi, e cila e prezantoi veten si Lucy, e hodhi poshtë idenë si “një gënjeshtër”. Kryebashkiaku është përballur si me banorët që nuk i duan dritat e reja të kuqe pranë shtëpisë së tyre, ashtu edhe me punonjëset e seksit që mendojnë se do të humbasin klientë. Më shumë se 20,000 njerëz kanë nënshkruar një peticion kundër transferimit, duke bërë thirrje për kontroll më të mirë të turmës në zonë dhe mbikëqyrje më të fortë të policisë, veçanërisht gjatë natës.
Mariska Majur, një ish-punonjëse seksi që tani punon për të drejtat e industrisë, tha se protestat kundër masës nuk janë asgjë e re pasi autoritetet komunale po lëvizin vazhdimisht vitrinat e dyqaneve.
“Autoritetet kishin tashmë një plan në vitin 2007 për të reduktuar një pjesë të shtëpive publike. Pastaj bëhej fjalë për luftimin e tutorëve dhe abuzimeve. Tani ka të bëjë me luftimin e turizmit masiv”, tha ajo.
Zhvendosja e lagjes së “dritës së kuqe” është një përpjekje tjetër e autoriteteve komunale të Amsterdamit për të ndryshuar imazhin e qytetit si “kryeqyteti i partisë”. Pak muaj më parë nisi fushata “qëndroni larg” për të dekurajuar turistët që merreshin me turizëm seksual dhe turizëm të drogës.
