Policia ka goditur dy raste të kultivimit të drogës në Pukë dhe në Malësi të Madhe ndërsa është vënë në pranga një person. Në fshatin Selcë të Malësisë së Madhe, u gjetën të kultivuara në tokë 38 bimë kanabis. Në afërsi të vendit ku u gjetën bimët, policia zbuloi një ambient të përshtatur për tharjen e bimëve.
Nga kontrollet, në këtë ambient u gjetën qindra degë bimë kanabis, në proces tharjeje, si dhe rreth 2.6 kilogramë lëndë e dyshuar kanabis, në formë boçeje. Bimët narkotike u asgjësuan nëpërmjet djegies ndërsa vijojnë hetimet intensive për identifikimin dhe për kapjen e autorit/ëve të këtij rasti.
Ndërsa në fshatin Dom të Pukës, policia gjeti 24 bimë të dyshuara kanabis të kultivuara në vazo, si dhe 201 gramë kanabis në proces tharjeje. Në përfundim të veprimeve procedurale për rastin, u arrestua një 24 vjeçar si dhe u sekuestrua në cilësinë e provës materiale, sasia e lëndës narkotike./abcnews.al
