Barcelona mori një barazim me fat në ndeshjen e parë të Champions League kundër Dortmundit, ndërsa nesër pret Interin në shtëpi. Ernesto Valverde vlerëson zikaltrit e Contes në konferencën për shtyp, mbi të gjitha repartin e mbrojtjes.
Trajneri i Barcelonës sqaron gjendjen e të dëmtuarve dhe zbulon pozicionin e tij të preferuar për Griezmann.
INTERI – “Ata kanë ndryshuar shumë nga sezoni i kaluar dhe i kanë bërë një nisje të madhe sezonit. Do të jetë një ndeshje e vështirë për ne dhe do hasim vështirësi për të shënuar. Interi është në formë, por ne duhet ta fitojmë këtë përballje. E kemi skuadrën për ta realizuar diçka të tillë.”
MUNGESAT – “Dembele zhvilloi vetëm një pjesë të seancës stërvitore ditën e djeshme, ndërsa Messi pak më shumë se gjysmën. Nuk e di nëse mund të bazohemi tek ta për duelin me Interin.”
GRIEZMANN – “E shoh më mirë majtas ose në qendër. Djathtas kemi lojtarë të tjerë. Gjithsesi, gjëja më e rëndësishme është që Griezmann duhet të qëndrojë shumë afër portës kundërshtare.” /abcnews.al
