Juventusi pret në Torino gjermanët e Bayer Leverkusen nesër në mbrëmje. Bardhezinjtë do të synojnë fitoren e parë në kompeticion e shumëdëshiruar. Maurizio Sarri bën thirrje për kujdes.
“Aspirinat” nuk duhen nënvlerësuar dhe ekipi nuk duhet ta ketë mendjen në duelin e fundjavës kundër Interit në San Siro. Sarri analizon me detaje ekipin gjerman, tregon se ku duhet përmirësuar ekipi i tij dhe e mbyll me Aaron Ramsey, i cili e ka befasuar plotësisht
BAYER – ”Nuk mund të mendojmë për Interin. Leverkusen ndodhet 1 pikë poshtë Bayernit në Bundesligë dhe ka parametrat fizikë më të mirë në Gjermani. Janë një ekip që bën shumë mirë edhe qarkullimin e topit. Është një ndeshje me shkallë vështirësie të lartë dhe do ishte gabim i çmendur ta kemi mendjen tjetërkund.”
CHAMPIONS – “Ky është një kompeticion që varet nga detajet. I vetmi objektiv që i kam vënë vetes është kualifikimi për më tej. Duhet të zbresim në fushë të lirshëm dhe nuk duhet të na kthehet në fiksim fitimi i Champions League. Është e vështirë për skuadrat italiane, mendoj se favoritë janë anglezët. Duhet të përmirësohemi në qarkullimin e topit. Duhet ta bëjmë më shpejt dhe duhet të përmirësohemi në finalizim.”
RAMSEY – “Aaron po bën mirë, por ka ende nevojë për t’u përmirësuar. Më ka befasuar me shpejtësinë me të cilën është përshtatur.” /abcnews.al
