Kryeministri Edi Rama në një intervistë të dhënë për median greke Kathimerini, ka dhënë detaje në lidhje me arrestimin e Belerit, për blerje votash.
Ai është pyetur se pse vijon që kryebashkiaku i zgjedhur i Himarës është i vetmi që po qëndron në burg nën akuzën e shit-blerjes së votave, ku shprehet se nuk është kompetencë e qeverisë burgosja e tij.
“Përgjigja është shumë e thjeshtë, e para burgosja e njërit e mosburgosja e tjetrit nuk ka fare lidhje me qeverinë dhe mua. E dyta, burgosja e njërit ka të bëjë me kapjen në flagrancë. Çështjet e tjera bazohen në akuza dhe hetimet vijojnë. Kështu që krahasimi nuk qëndron realisht”, është shprehur Rama.
Gjithahstu Rama ka theksuar se askush deri më tani nuk i di provat e plota të arrestimit të Belerit, pasi sipas tij janë sekret hetimor.
“Askush nuk di provat e plota përveç prokurorëve, që mbeten në heshtje për shkak të sekretit të investigimit. Kur të shfaqen në gjykatë provat e plota do të bëhen të njohura tek të gjithë e atëherë kushdo mund të gjykojë. Nuk komentoj sepse asnjëherë nuk komentoj punën e këtyre institucioneve të drejtësisë. Nuk do gjeni asnjë çështje të komentuar nga unë. E vetmja ndërhyrje qeveritare që kur reforma në drejtësi mori rrugën e saj është ndërhyrja e qeverisë greke. Nga qeveria shqiptare nuk ka pasur e nuk do ketë asnjë ndërhyrje”, ka thënë kreu i qeverisë.
Ndërkohë sa I përket mbështetjes që mund ti jepet atij për tu betuar në burg, Rama është shprehur se ligji nuk e lejon një gjë të tillë.
“Mund të gjeni “dritaren” më të vogël në legjislaturën tonë që të lejojë betimin në burg me noter? Nuk ekziston diçka e tillë”. /abcnews.al
