Banorët e një fshati afër vendit të rrëzimit të avionit me të cilin besohet se udhëtonte në shefi i Wagner-it, Yevgeny Prigozhin, thanë se kishin dëgjuar një zhurmë dhe më pas panë avionin të rrëzohej në tokë.
Avioni privat Embraer Legacy 600 u rrëzua të mërkurën pranë fshatit Kuzhenkino në rajonin Tver të Rusisë, gjatë rrugës nga Moska për në Shën Petersburg dhe vrau të gjithë 10 personat në bord.
Nuk ka pasur asnjë koment zyrtar nga Kremlini apo Ministria e Mbrojtjes për fatin e Prigozhin, por një kanal në Telegram i lidhur me grupin e tij mercenar, Zona Gri, e shpalli atë të vdekur.
Një banor i Kuzhenkino tha për Reuters: “Dëgjova një shpërthim ose një zhurmë. Zakonisht, nëse një shpërthim ndodh në tokë, dëgjoni një jehonë, por ishte vetëm një zhurmë. Ngrita sytë dhe pashë tym të bardhë. Një krah fluturoi në një drejtim dhe trupi i avionit shkoi ashtu,” tha banori.
Një tjetër fshatar tha: “Për sa i përket asaj që mund të kishte ndodhur, do të them vetëm këtë: nuk ishte bubullimë, ishte një zhurmë metalike – le ta themi kështu. Kam dëgjuar gjëra të tilla më parë.”
Rrëzimi i avionit ndodhi dy muaj pas ditës kur Prigozhin udhëhoqi një rebelim të dështuar kundër drejtuesve të lartë të ushtrisë, duke i akuzuar ata për paaftësi në trajtimin e luftës së Rusisë në Ukrainë.
Hetuesit rusë thanë se kishin hapur një hetim penal. Disa burime të paidentifikuara thanë se besonin se avioni ishte rrëzuar nga një ose më shumë raketa tokë-ajër. Reuters nuk mund ta konfirmonte këtë./abcnews.al
