Rritja ekonomike e Kinës ishte më e ulët nga parashikimet në tremujorin e dytë të vitit, duke shtuar shqetësimet për papunësinë në rritje të të rinjve dhe një sektor të dobët të pronave të paluajtëshme. Në një situatë të tillë duket se do të rriten gjasat që qeveria të dyfishojë mbështetjen për rimëkëmbjen pas COVID-19.
Ekonomia e dytë më e madhe në botë u rrit me një ritëm vjetor prej 6.3% në tremujorin prill-qershor, shumë më i ngadalshëm nga mbi 7% rritje që kishin parashikuar analistët duke pasur parasysh ritmin anemik të aktivitetit ekonomik një vit më parë.
Papunësia e të rinjve të moshës 16 deri në 24 vjeç u rrit në një rekord prej 21.3% në qershor, nga 20.8% një muaj më parë.
Investimet në zhvillimin e pronave të patundshme, një nxitës i rëndësishëm i kërkesës industriale dhe konsumatore, u ulën me 7.9% në gjysmën e parë të vitit në krahasim me një vit më parë në një shenjë shqetësuese të dobësisë së vazhdueshme në një industri që u ngadalësua edhe përpara pandemisë ndërsa qeveria ndërhyri për të frenuar huamarrjet e tepërta.
Zyrtarët kanë pranuar se ekonomia po përballet me vështirësi të shumta, por thanë se prisnin që rritja të arrijë ende objektivin zyrtar prej rreth 5% të Partisë Komuniste në pushtet për këtë vit.
Qeveria do të rregullojë politikat për të stabilizuar rritjen, tha zëdhënësi i Byrosë Kombëtare të Statistikave Fu Linghui në një konferencë shtypi të hënën.
Sipas të dhënave të qeverisë të publikuara të hënën rritja tremujore ishte 0.8%, në përputhje me parashikimiet, por në rënie të ndjeshme nga 2.2% në periudhën janar-qershor.
Analistët kanë qenë shumë më pak optimistë sesa qeveria kineze për perspektivën e vitit, duke pasur parasysh dobësimin e kërkesës për eksportet kineze në ekonomitë e tjera të mëdha.
Rritja prej 6.3% e prodhimit të brendshëm bruto të Kinës nga prilli në qershor tejkaloi një rritje prej 4.5% në tremujorin e mëparshëm.
Rritja ende e fuqishme është kryesisht për shkak të rritjes së ekonomisë me vetëm 0.4% një vit më parë në periudhën prill-qershor të vitit 2022, mes bllokimeve të rrepta në Shangai dhe qytete të tjera gjatë shpërthimeve të COVID-19.
Në fillim të këtij viti, rritja u shtua pasi njerëzit u dyndën në qendrat tregtare dhe restorante pas gati tre vjet kufizime që u u hoqën në fund të vitit 2022.
Objektivi i rritjes së qeverisë prej “rreth 5%” u pa si një objektiv konservator. Ajo mund të arrihet vetëm nëse ekonomia vazhdon të mbajë nivelit aktual të rritjes.
Të dhënat e publikuara më herët treguan se eksportet ranë me 12.4% në qershor nga një vit më parë pasi kërkesa globale ra pasi bankat qendrore në SHBA dhe Evropë ngritën normat e interesit për të frenuar inflacionin.
Shitjet me pakicë, një tregues i kërkesës së konsumatorit, në qershor u rritën 3.1% nga e njëjta periudhë e vitit 2022. Kjo shihet si një pikë e fortë, por jo mjaft e fortë, thanë analistët.
Prodhimi industrial, i cili mat aktivitetin në sektorët e prodhimit, minierave dhe shërbimeve komunale, tejkaloi pritshmëritë e analistëve, duke u rritur me 4.4% në qershor krahasuar me të njëjtin muaj të një viti më parë.
Politikëbërësit e Kinës nuk duhet të luftojnë inflacionin, por mund të përfundojnë duke u përballur me të kundërtën e tij, deflacionin ose rënien e çmimeve për shkak të kërkesës së dobët. Në muajt e fundit, autoritetet janë përpjekur të nxisin huadhënien dhe shpenzimet./VOA
