Bashkimi Evropian ka bërë thirrje për zgjatjen e marrëveshjes së emërtuar Iniciativa e Grurit në Detin e Zi e cila siguron dërgimin e grurit të Ukrainës në tregjet ndërkombëtare.
Një nga zëdhënësit e Komisionit Evropian, Peter Stano në një konferencë për media iu përgjigj pyetjes rreth marrëveshjes së grurit duke thënë se si BE prioritet i tyre është që gruri ukrainas të dërgohet në tregun botëror.
“U bëjmë thirrje të gjitha palëve të kësaj iniciative për zgjatjen e marrëveshjes. I vlerësojmë si të nevojshme bisedimet nën kryesimin e Turqisë dhe Kombeve të Bashkuara”, tha Stano.
Ai tha se janë të hapur të hulumtojnë të gjitha zgjidhjet që sigurojnë zgjatjen e marrëveshjes. Stano theksoi se në të njëjtën kohë do të vazhdojnë qëllimin për të penguar sa të jetë e mundur aftësitë luftarake të Rusisë në Ukrainë.
Në mediat ndërkombëtare pretendohet se BE-ja me zgjatjen e marrëveshjes, mendon të heqë sanksionet ndaj Bankës Bujqësore të Rusisë (Rosselkhozbank).
Marrëveshja e Korridorit të Grurit në Detin Zi
Për të ulur ndikimin mbi çmimet globale të ushqimit si pasojë e sulmit të Rusisë kundër Ukrainës, OKB-ja, Rusia, Turqia dhe Ukraina me një takim të mbajtur në Stamboll më 22 korrik 2022 nënshkruan Marrëveshjen e Korridorit të Grurit në Detin e Zi.
Afati i marrëveshjes i cili më parë është zgjatur disa herë, do të përfundojë më 17 korrik. Zyrtarët rusë thonë se nuk shohin ndonjë mundësi për zgjatjen e marrëveshjes.
Zëdhënësi i Kremlinit, Dmitry Peskov në një deklaratë më 3 korrik, vlerësoi mundësinë e heqjes së sanksioneve të SWIFT (sistemi ndërkombëtar i pagesave) ndaj të gjitha bankave ruse, përfshirë edhe Bankën Bujqësore të Rusisë (Rosselkhozbank) dhe tha se në marrëveshjen e grurit nuk zbatohet pjesa që ka të bëjë me Rusinë.
“Ka edhe pak kohë deri në përfundimin e afatit të marrëveshjes. Por, nuk ka as shpresë se kjo pjesë do të zbatohet”, theksoi Peskov.
