Kimberly West, një ish-prokurore federale amerikane me përvojë të madhe në hetimet penale vendase dhe ndërkombëtare, është zgjedhur prokurore në Gjykatën Specialet ë Hagës, e cila heton krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.
West është bërë prokurorja e tretë, duke pasuar Jack Smith, i cili u largua nga Zyra e Prokurorit të Specializuar (SPO) në nëntor 2022, duke marrë postin e Këshilltarit Special në Shtetet e Bashkuara.
“Është një nder që jam përzgjedhur për këtë rol të rëndësishëm dhe sfidues”, tha West. “Mezi pres t’i bashkohem SPO-së.”
West do të jetë pjesë e SPO-së nga Firma Ligjore Ashcroft në Boston, Massachusetts, ku ajo ka qenë partnere që nga viti 2019, duke u fokusuar kryesisht në mbrojtjen e jakave të bardha.
Përpara se t’i bashkohej firmës, West punoi si prokurore për më shumë se dy dekada në role lokale, shtetërore, federale dhe ndërkombëtare. West ishte gjithashtu shefe e Byrosë Kriminale në Zyrën e Prokurorit të Përgjithshëm të Massachusetts midis 2015 dhe 2019.
Ajo drejtoi një ekip prej më shumë se 120 profesionistësh përgjegjës për hetimin dhe ndjekjen penale të një game të gjerë mashtrimesh financiare, korrupsionit, narkotikëve, vepra penale dhe trafikimit të qenieve njerëzore dhe ndihmoi viktimat dhe dëshmitarët.
West ka shërbyer gjithashtu si Ndihmës Prokurore e SHBA-së për dy vjet dhe në Njësinë e Sigurisë Kombëtare për gjashtë vjet. West iu bashkua Njësisë së Sigurisë Kombëtare pas sulmeve terroriste të 11 shtatorit 2001 në Qendrën Tregtare Botërore dhe Pentagon.
Për pesë vjet, midis 2008 dhe 2013, West shërbeu si prokurore në Gjykatën Penale Ndërkombëtare për ish-Jugosllavinë në Hagë, ku ajo ishte anëtare e ekipit që ndoqi penalisht Radovan Karaxhiqin për rolin e tij në gjenocidin e Srebrenicës.
Ajo ishte gjithashtu pjesë e Prlic et al, ekipi i akuzës me fokus krimet e kryera në Mostar dhe shkatërrimin e Urës së Vjetër. West është diplomuar për juridik në Universitetin Suffolk, Massachusetts. Ajo gjithashtu ka një diplomë Bachelor të Arteve nga Boston College, Massachusetts.
West është bërë prokurorja e tretë e specializuar, pas Jack Smith, i cili shërbeu si prokuror midis 2018 dhe 2022 dhe David Schwendiman, i cili shërbeu midis 2016 dhe 2018.
Alex Whiting, i cili ka marrë detyrën e prokurorit të specializuar që nga nëntori 2022, do të vazhdojë punën derisa West të marrë postin e saj.
/abcnews.al
