Kombëtarja e shpresave ka pësuar një humbje të thellë në miqësoren e zhvilluar ndaj Francës. Të besuarit e trajnerit Alban Bushi u mundën me rezultatin 4-0.
Kombëtarja e shpresave zhgënjeu në testin miqësor përballë Francës. Të besuarit e trajnerit Alban Bushi u mundën në Emjan me rezultatin e thellë 4-0. Kuqezinjtë u paraqitën mirë në pjesën e parë ndërkohë që vendasit realizuan një minutë para përfundimit të kohës së rregullt me Emin Guiri nga pika e bardhë e 11 metërshit duke mposhtur portierin Selmani.
Në fraksionin e dytë trajneri Bushi kryen disa zëvendësime, por që nuk ndryshojnë rrjedhen e lojës, përkundrazi francezët shënojnë edhe tre gola të tjerë. Franca realizon edhe golin e dytë me autor Eduard, i cili përfiton nga një gabim i mbrojtësit Mersinaj.
Është sërish i njëjti autor i cili realizon për shifrat 3-0. Për shifrat 4-0 mendon Zagadu në kohën shtesë. Shqipëria vuan dhe trajneri Bushi nuk merr përgjigjen e duhur nga lojtarët. Shpresat do të luajnë të hënën ndeshjen kualifikuese të Euro 2021 ndaj Austrisë në Niko Dovana. /abcnews.al
