Një çift kinez është arrestuar në Rinas pasi tentuan të kalonin kufirin me leje qëndrimi false. Çifti do të udhëtonin drejt Kanadasë por pas kontrollit të imtësishëm, rezultoi se lejet e qëndrimit të tyre ishin të falsifikuara. Ata akuzohen për veprën penale “Falsifikimi i dokumenteve”, kryer në bashkëpunim.
“Shërbimet e Policisë Kufitare të Rinasit, bazuar në analizën e riskut, kanë intensifikuar kontrollet përmes pajisjeve dedektuese bashkëkohore, me qëllim parandalimin, evidentimin dhe goditjen e krimeve kufitare. Si rezultat, u kapën në flagrancë dhe u arrestuan shtetasit:
– L. Ch., 36 vjeç dhe Y. Ch., 33 vjeçe (bashkëshortë), të dy banues në Kinë.
Këta shtetas u kaluan në vijën e dytë, për kontroll të imtësishëm dhe gjatë verifikimeve, rezultoi se lejet e qëndrimit që paraqitën me qëllim udhëtimin drejt Kanadasë, ishin të falsifikuara.
Materialet procedurale i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme, për veprën penale “Falsifikimi i dokumenteve”, kryer në bashkëpunim.”, njofton policia.
