Në Ballkanin Perëndimor qarkullojnë rreth 6 milionë armë. Kështu thuhet në një raport të Komisionit Europian, që konstaton se vendet e rajonit kanë bërë pak përpjekje për kontrollin e armëve pa leje.
“Në Ballkanin Perëndimor ka rreth 6 milionë armë, nga të cilat dy të tretat janë të paregjistruara. Kjo përbën një kërcënim të vazhdueshëm për kontinentin europian”.
Ky është konstatimi i Komisionit Europian në një raport të publikuar së fundmi. Në Dhjetor të vitit 2014, Bashkimi Europian dhe vendet e Ballkanit Perëndimor miratuan një plan veprimi për armët e zjarrit për periudhën 2015-2019. Por vlerësimi i Komisionit Europian për këtë plan veprimi tregon se nuk është aspak i frytshëm.
Në plan evidentohet se ende nuk ka grumbullim të harmonizuar të të dhënave mbi sekuestrimet e armëve të zjarrit, që do të lejonte miratimin e një politike të bazuar në të dhëna faktike dhe një vlerësim të vërtetë dhe të besueshëm të tendencave të trafikut të armëve. Aktorët nuk kanë krijuar një model të raportimit për shkëmbimin e informacionit, gjë që bie në kundërshtim me planet e veprimit.
Pikat fokale kontrolluese për “armët e zjarrit” në vendet e Ballkanit Perëndimor nuk janë themeluar ende, ose s’janë operative dhe për rrjedhojë ka mungesë së gjetjeve sistematike të armëve të konfiskuara, mosintegrim të gjetjeve në bazën e të dhënave “i Arms”, ka mungesë të krahasimeve ndërkufitare në rajon, si dhe të analizave sistematike balistike ose të automatizuara.
Në raport thuhet, se kontrollet kufitare në Ballkanin Perëndimor kanë rezultuar të paefektshme për të zbuluar trafikimin e armëve të zjarrit, kryesisht për shkak të mungesës së informacionit, të formimit dhe të pajisjeve të rojeve kufitare apo agjentëve doganorë.
Në fund të raportit, Komisioni Europian i bën thirrje vendeve të rajonit dhe shteteve anëtare të përkthejnë angazhimet politike në prioritete operacionale dhe në rezultate.
Vendet e Evropës Juglindore kanë miratuar gjithashtu në vitin 2018 një plan rajonal për një zgjidhje të qëndrueshme të problemit për ndalimin e keqpërdorimit të armëve të vogla dhe të lehta dhe municionet e tyre deri në vitin 2024, nën iniciativën e Francës dhe Gjermanisë./ABC News Albania 24/7
