Presidenti amerikan Joe Biden do të udhëtojë në Kanada në mars, njoftoi Shtëpia e Bardhë të martën në fund të një takimi dypalësh me kryeministrin kanadez Justin Trudeau në Meksikë. Kjo do të jetë vizita e tij e parë në Kanada që nga marrja e detyrës në janar 2021.
Biden dhe Trudeau u takuan në Meksikë përpara samitit të 10-të të liderëve të Amerikës së Veriut të planifikuar për të martën pasdite së bashku me presidentin meksikan Andres Manuel Lopez Obrador. Biden falënderoi Trudeau për kontributin e Kanadasë në ofrimin e ndihmës ushtarake, ekonomike dhe humanitare për Ukrainën.
Të dy udhëheqësit diskutuan gjithashtu “krizën humanitare në Haiti”, një vend nga i cili vijnë shumë emigrantë që përpiqen të arrijnë në SHBA përmes Meksikës. “Të dy liderët u zotuan se do të vazhdojnë koordinimin me partnerët e tyre në Këshillin e Sigurimit të OKB-së, në fazat e ardhshme, për të mbështetur stabilitetin në Haiti, duke përfshirë ndihmën për policinë kombëtare të vendit”, theksohet në njoftim.
Në fillim të samitit në Meksikë, të dy udhëheqësit premtuan “veprim të guximshëm për të luftuar ndryshimet klimatike dhe për ta kthyer Amerikën e Veriut në një motor për zhvillimin e energjisë së pastër”. Pasi u betua, Biden organizoi një takim në internet me Trudeau në shkurt 2021.
“SHBA nuk ka miq më të ngushtë se Kanadaja,” tha ai në atë kohë. “Kjo është arsyeja pse unë bëra telefonatën time të parë si president me ju, takimin tim të parë dypalësh me ju”, tha ai. /abcnews.al
