Shqiptarët që vuajnë dënimin në burgjet britanike do të dërgohen në Shqipëri për të vuajtur pjesën e mbetur të dënimit.
Një marrëveshje e zbuluar mbrëmjen e djeshme nga media britanike Daily Mail që është firmosur nga ministrat e Drejtësisë, Ulsi Manja dhe Dominic Raab, parashikon që në fillim të janarit, Britania të dërgojë 50 të dënuar shqiptarë nga burgjet e saj për të vuajtur dënimin e mbetur në burgjet shqiptare.
Deri më tani, deportimet e Home Office në Tiranë përfshinin ose kriminelë që kanë mbaruar dënimet në Mbretërinë e Bashkuar ose njerëz që ndodheshin në Britani ilegalisht, shpesh pasi kalonin Kanalin me varka të vogla.
Një burim nga qeveria shqiptare tha dje se bisedimet intensive mes Ministrisë së Drejtësisë së Britanisë dhe ministrit shqiptar Ulsi Manja, kanë çuar në një pakt për transferimet e para në burg.
“Ne kemi kapacitete të kufizuara në burgjet tona. Por për të treguar se jemi gati të përmbushim detyrimet tona ndaj Britanisë së Madhe, ne kemi rënë dakord të presim 50 shqiptarë që kanë shprehur gatishmërinë për t’u kthyer”, shtoi burimi.
Shtetasit shqiptarë përfaqësojnë rreth 10 për qind të të huajve të mbajtur në burgjet angleze dhe të Uellsit. Në numërimin e fundit kishte më shumë se 1,336, numri më i madh i kriminelëve jashtë shtetit pas hekurave.
Megjithëse grupi i parë i të dëbuarve kanë rënë dakord të kthehen, marrëveshja Shqipëri-MB thotë se të burgosurit mund të transferohen në të ardhmen pa pëlqimin e tyre.
Dhjetë largimet fillestare pritet të ndodhin në javët e para të vitit 2023.
Shqiptarët që vuajnë dënimet më të gjata në burg përfshijnë dy vrasës dhe tre mbretër të drogës, të cilët aktualisht janë duke vuajtur një total prej 143 vitesh, me një kosto për kuletën publike prej 6,864,000 £ në çmimet aktuale, pa marrë parasysh inflacionin e ardhshëm./Abcnews.al/
