Komisioni Qendror i Zgjedhjeve ka marrë më pak se gjysmën e fondit që kishte kërkuar për zgjedhjet e ardhshme lokale. Në buxhetin e viti të ardhshëm, qeveria i ka dhënë KQZ-së vetëm 18 milionë euro, kundrejt një kërkese për 37 milionë.
Ilirjan Celibashi e zbardhi shifrën e kërkuar në ABC, duke e motivuar me aspiratën që votimi elektronik të shtrihej në 8 bashki.
ABC u interesua pranë KQZ-së, për të mësuar nëse fondi prej 18 milionë eurosh që ka dhënë qeveria, mjaftojnë për organizimin e zgjedhjeve. Informacionet e marra referojnë se këto para mjaftojnë për një proces normal, duke plotësuar të gjithë bazën materiale dhe pagesat e stafit. Njëherësh, me aq para, edhe në këto zgjedhje do të bëhet identifikimi biometrik i zgjedhësve në mbarë vendin, pasi makineritë e blera në zgjedhjet e shkuara janë ende në gjendje pune dhe duan vetëm një mirëmbajtje që nuk kushton shumë.
Do të përdoren po ashtu kamera në çdo qendër votimi si herën e shkuar.
Por burimet pranë KQZ-së, thanë se këto para nuk mjaftojnë për të kryer votim elektronik në asnjë njësi zgjedhore. Testimi i kësaj metode në njësinë 10 në Tiranë dhe në bashkinë Vorë solli një përshpejtim të procesit të shpalljes së rezultateve dhe uli tensionet elektorale. Gjithsesi, burimet i thanë ABC-së se KQZ do të përpiqet që gjatë diskutimit të buxhetit në parlament, t’i bindë autoritet të shtojnë fondet për zgjedhjet./abcnews.al/
