Ana Maria Markovic është cilësuar si futbollistja më e bukur në botë, teksa vetë lojtarja nuk e pëlqen të cilësohet kështu, pasi sipas saj janë të shumë ata që e shikojnë vetëm nga pamja e jashtë dhe jo nga ajo çfarë di të bëjë në fushën e blertë.
22-vjeçarja luan në Zvicër me Grasshopper, teksa me vesh edhe fanellën e kombëtares kroate. Sulmuesja gjithashtu shprehet se e marrin në telefon njerëz që shtiren sikur janë agjentë ndërsa shton se ajo e di shumë mirë arsyen e vërtetë të këtyre telefonatave.
“Nuk e kam bezdi kur më thonë se jam e bukur, e vlerësoj komplimentin. Por, nuk më pëlqejnë disa artikuj ku më cilësojnë vetëm si “futbollistja sexy”. Kjo i bën të tjerët të mos më shohin si futbolliste dhe diçka e tillë nuk është e mirë për mua dhe familjen time. Kam marrë shumë telefonata nga njerëz që shtiren sikur janë trajnerë apo menaxherë. Unë e di shumë mirë se çfarë duan ato. Nuk më kanë parë kurrë të luaj futboll dhe gjykojnë vetëm pjesën e jashtme, për mua është një mëkat i madh. Por, ndonjëherë më vijnë edhe mesazhe qesharake nga persona të cilët ofrohen të më pastrojnë këpucët pas ndeshjes apo stërvitjeve”, tregon Markovic.
Në fund, 22-vjeçarja tregon se idhulli i saj është Cristiano Ronaldo, por shton se edhe bashkëkombasi i saj, Luka Modric është një shembull shumë i mirë.
“Modric është një model shumë i mirë për mua, është një futbollist i kalibrit botëror dhe përfaqëson Kroacinë. Edhe në futbollin e femrave ka lojtare shumë të mira, por idhulli im është Cristiano Ronaldo. Është shumë i disiplinuar, në sport është shumë e rëndësishme të japësh maksimumin dhe të duhet një mentalitet si i Ronaldos”, u shpreh Ana Maria Markovic. /f.a/abcnews.al
