Presidenti amerikan Donald Trump ka deklaruar të enjten se nuk ka një opinion personal për arrestimin e themeluesit të web sitet Uikiliks, Xhulian Asanzh, që tashmë përballet me mundësinë e ekstradimit në Shtetet e Bashkuara.
“Nuk di asgjë për Uikiliks, nuk merrem me të dhe nuk kam një opinion”, ka deklaruar Trump për gazetarët përpara një takimi me presidentin koreano-jugor Mon Jae In.
Por në vitin 2016, gjatë fushatës elektorale, Trump vazhdimisht vlerësoi portalin ku publikoheshin kabllogramet e diplomacisë amerikane.
“Unë e adhuroj Uikiliks”, deklaroi asokohe Trump, pasi faqja e internetit kishte publikuar një paketë email-esh të Partisë Demokratike, të cilat dëmtuan kandidaturën e rivales së tij në zgjedhje, Hillari Klinton.
Në Shtetet e Bashkuara, prokurorët e kanë akuzuar Asanzh për komplot në bashkëpunim me ish-oficerin e ushtrisë Çelsi Mening për të pasur akses në kompjuterët e qeverisë, nga të cilët mund të vidhte informacionet konfidenciale.
Mening u dënua nga një gjykatë ushtarake në vitin 2013 për spiunazh në lidhje me publikimin e 700 mijë dokumenteve, videove dhe materialeve diplomatike e luftarake në faqen e Uikiliks. Megjithatë, dënimi prej 28 vjet burg u fal nga presidenti Barak Obama./abcnews.al
