Loading ...
Shqipëria ka pasur prodhimin më të lartë të energjisë elektrike në 10 vitet e fundit gjatë vitit 2021.Të dhënat e Entit Rregullator të Energjisë elektrike tregojnë se në 2021 prodhimi vendas i energjisë elektrike është 8,962,699 Mwh ku peshën kryesore e mban KESH me rreth 60% të totalit.
Nga analiza e historikut të prodhimit të energjisë elektrike të regjistruar në vend, rezulton se viti i kaluar është mbi mesataren e për periudhën 2009 – 2021. Sipas ERE mesatarja e prodhimit të energjisë elektrike për këtë periudhë ka rezultuar mbi 6 mln MwH. Në këtë mënyrë energjia e prodhuar është 47.5% më e lartë se mesatarja e prodhimit në një dekadë.
Viti 2021 konsiderohet si një vit i mirë hidrologjik, por si ka qenë konsumi gjatë këtij viti?
Bizneset dhe qytetarët kanë konsumuar sipas ERE 8,414,836 Mwh por kjo sasi mbetet më e vogël se prodhimi total i energjisë në vend.
Niveli i prurjeve të ujit përgjatë vitit 2021 është i përafërt me mesataren historike në pjesën më të madhe të vitit . Prurjet maksimale të ujit në Liqenin e Fierzës janë regjistruar në muajin janar 2021 me 685 m3 /s ndërsa ato minimale janë regjistruar në muajin gusht 2021 me 48 m3 /s.
Aktualisht qeveria ka shpallur emergjencë energjitike ndërsa opozita e kritikon për keqmenaxhim të kaskadës së Drinit. Për shkak të luftës Rusi –Ukrainë çmimi i energjisë elektrike ka arritur nivele rekord në bursa duke i rënduar buxhetit të shtetit. /abcnews.al/
