Një video e siguruar nga ABC përmes rrjeteve sociale ngre alarmin për një problematikë të rëndë në vendin tonë, ajo e vrasjeve apo vetëvrasjeve enigmatike përmes riteve satanike apo të sekteve të tjera.
Në video duket një person pranë bregdetit në orët e vona të mbrëmjes ose në kohë muzgu që mban në duar një qen dhe përpiqet ta mbysë. Ndërkohë persona të tjerë që qëndrojnë në distancë prej tij e filmojnë. Eksperti i kriminalistikës Ervin Karamuço ishte i ftuar në ABC Live me moderatoren Sibora Bitri ku shpjegoi disa elementë të kësaj video.
“Në brigjet shqiptare sidomos gjatë verës edhe për shkak të disa elementëve që u duhen atyre, mundohen të kryejnë disa rituale pranë plazheve ku ndër vite ka pasur informacione për kafshë të ngordhura dhe të djegura.
Unë këtë video e kam parë dhe më shumë kam lexuar komentet. Ajo që kam kuptuar është se ata kanë bërë një ritual me një gjuhë që nuk kuptohej. Nuk e kanë sakrifikuar dot kafshën dhe janë futur në det për ta mbytur. Vetëm kështu mund ta kuptoja”, u shpreh Karamuço.
Sipas tij video mund të jetë xhiruar në Patok, Seman ose Velipojë. Dyshimet janë se këto akte kryhen nga grupet rinore që vijnë nga jashtë. “Informacionet e mëparshme kanë qenë për Velipojën, Patokun, pse jo edhe për Semanin. Informacionet paraprake kanë qenë për disa party rinore që vijnë edhe nga jashtë. Këto video kanë edhe një specifikë. I shpërndajnë me njëri tjetrin që e kanë bërë ritualin dhe më pas ka rrjedhur kjo video.
Video mund të jetë bërë gjatë darkës, ose gjatë mbrëmjes. Ata kanë disa elementë që e lidhin, janë disa elementë metafizikë. Këto quhen platonike. Por me aq sa kemi ne aty mund t’i japim dot një element të plotë. Veshja duket si pelerinë e zezë. Alarmi më i madh është që kemi arritur deri këtu. Rinia është e atashuar dhe kanë një kureshtje për këto lloj ritualesh. Nesër disa prej këtyre që mund të shkojnë edhe te vrasja e njerëzve. Ata kalojnë në sprova të vështira. Disa drejtohen me një lloj ndërgjegje të lartë duke marrë në konsideratë edhe njohuri që i marrin edhe nga librat.
Problemi i Shqipërisë është se kemi shumë pak njohuri. Kjo veprimtari ka elementë kriminalë. Videot janë hequr sepse ai që i mëson i ka kërkuar të hiqen videot. Shumica prej këtyre videove kanë disa kode që ne nuk i kuptojmë. Aty mund të shohim që mund të jetë sakrifikuar një kafshë por nuk identifikojmë dot grupin dhe as kultin”, tha ai.
Arsyeja pse shpesh herë këto grupe zgjedhin qentë për t’i sakrifikuar është fakti që janë lehtësisht të gjendshëm në rrugë. “Qentë zgjidhen pasi gjenden kollaj në rrugë. Pasi ata kërkojnë thjesht një frymor për ta realizuar”, deklaroi Karamuço.
Ka disa shkaqe pse ata e publikojnë videon në rrjetet sociale nisur nga fakti që mund të jetë një lloj testimi për pjesën tjetër, sprovë për ata që nuk janë bërë pjesë të grupit dhe një formë për të marrë gradat. Karamuço u shpreh se ata që nuk kalojnë testet shihen si inferior dhe ka gjasa të përfundojnë të sakrifikuar ose vetësakrifikohen.
“Sprovat, testimet janë për të marrë gradat. Ata testohen të gjithë dhe në rast se nuk i kalojnë testet dhe shihen si rol inferior. Këta persona edhe mund t’i sakrifikojnë edhe mund të vetësakrifikohen. Të gjithë ata që hapin librat dhe studiojnë këto lloj teorish mbyllen në vetvete. Sepse mesazhi që marrin është se ky realitet është i rremë. Ne duhet t’i ndriçojmë këta njerëz që të mos përfshihen. Edhe në rast se e gjen personin në video vepra penale është vetëm kundër kafshës. Pastaj mund të dalin hipoteza të tjera nëse e ka mbytur kafshën apo e mban në dorë. Ne e themi çdo javë”, u shpreh ai.
Ai mori si shembull rastin e një poni të gjetur në Britaninë e Madhe me organe të hequra të sakrifikuar për një akt satanik. “Kemi rastin e një kali, poni të gjetur në Britani me organet e hequra. Në përfundim ekspertët arritën në përfundim që kali ishte marrë nga ferma dhe është sakrifikuar diku për nevojat e një rituali. Është ende e paspecifikuar nëse është bërë për një akt satanik.
Është vepër penale edhe vrasja e kafshëve. Edhe torturat. Të gjitha këto janë pjesë e legjislacionit tonë. Me kuaj ka pasur raste edhe në Francë. Vetëm më Los Angelos janë sakrifikuar 300 qen”, tha ai. /abcnews.al
