Juventus është gati për duelin kundër Chelsea në Londër. Bardhezinjtë janë kualifikuar dhe tani në diskutim është vetëm vendi i parë në grup. Trajneri Massimiliano Allegri, në konferencën e sotme për shtyp, deklaroi:
“Nesër do të luajmë për vendin e parë, kundër një ekipi që kryeson Premier League dhe vitin e kaluar ata fituan Champions League. Me Lukakun ata luajnë ndryshe, kurse pa Lukakun kanë më pak pika referimi. Për ne është një test i rëndësishëm”.
Në lidhje me kapitenin Paulo Dybala, trajneri i Juventusit shtoi: “Nuk e di nëse ka minuta në këmbë sepse nuk ka luajtur këto kohë. Ai ka dhjetë ditë jashtë fushave. Megjithatë ai dhe Kulusevski janë grumbulluar”.
“Moduli? Është çështje karakteristikash. Duhet të përmirësojmë fazën e shënimit. Krijojmë situata të rrezikshme dhe gabojmë në finalizim. Në Romë rrezikuam, duke mos mbyllur aksionin dhe duke pësuar kundërsulme. Kemi shënuar 18 gola dhe kemi pësuar 15. Ne duhet të gjejmë më shumë gola si ekip”. / abcnews.al
