72 orë qëndroi e zhdukur sekretarja e Gjykatës së Lezhës Klaudia Marku, e cila është gjetur ditën e sotme pas denoncimit të bërë nga bashkëshorti. Në dëshminë e dhënë në polici ajo ka deklaruar se ishte larguar pas një debati me bashkëshortin. Gjatë këtyre orëve ajo ka qëndruar në një hotel në Lezhë. Shkëputjen e kontakteve me të shoqin, ajo e justifikon me faktin se i ishte bllokuar telefoni. Megjithatë sekretarja thotë se ka folur me familjarët e saj.
“U largova nga banesa për çështje të brendshme familjare. Jam larguar pas një debati me bashkëshortin. Nuk e kam menduar se çështja do të shkonte kështu. Kam qëndruar në një hotel në Lezhë më ishte bllokuar dhe celulari. S’e mendova se çështja do bëhej kaq e madhe”, ka thënë ajo mes të tjerash.
Duke mos e menduar se burri do ta denonconte të zhdukur dhe se çështja s’do bëhej kaq e madhe, ajo nuk i ka parë lajmet që janë bërë në lidhje me të për shkak se i ishte bllokuar telefoni. Gjendja e saj psikologjike aktualisht është e rënduar kur ka marrë vesh që ka qarkulluar nëpër media.
34 vjeçarja që prej së martës e kishte të fikur telefonin. Por denoncimi në polici nga bashkëshorti, u bë mbrëmjen e djeshme. Nëna e dy fëmijëve kishte folur me prindërit e saj. Ata janë pyetur nga policia dhe konfirmojnë që kanë biseduar në telefon. Më pas policia e Lezhës ka thirrur miqtë e sekretares së gjykatës. Si prindërit dhe këta të fundit, kanë thënë se bashkëshorti e dhunonte prej kohësh.
Në bazë të këtyre dëshmive, policia dyshon se 34 vjeçarja është larguar nga banesa për shkak të konflikteve familjare. Një gjë të tillë e konfirmoi dhe vetë ajo në dëshminë e dhënë në polici. be.k/abcnews.al
