Të paktën dy kalimtarë janë plagosur në një prej rrugëve kryesore në Marsejës, pasi një 36 vjecar i ka sulmuar me thikë. Agresori ka kërcënuar me armë edhe policinë e nga shkëmbimi i zjarrit janë plagosur dy kalimtarë të tjerë dhe është vrarë vetë agresori.
Një person ka sulmuar me thikë kalimtarët duke plagosur të paktën dy prej tyre. Ngjarja e rëndë ndodhi në Kanebjer të Marsejës, pasditen e të martës. Burime të autoriteteve thonë se personi iu drejtonte pyetje kalimtarëve në gjuhën frënge e në një gjuhë të panjohur, duke i pyetur për kombësinë e në varësi të përgjigjes së tyre, i qëllonte ose jo me thikë. Në një konferencë për shtyp prokurori i Marsejës Kzavje Tarabë theksoi se gjithsesi personi nuk kishte shqiptuar fjalët Allahu Ekber.
Ngjarja ndodhi në afërsi të komisariatit qendror të Marsejës e policia është vënë menjëherë në veprim. Thirrjeve për t’u dorëzuar, ai u përgjigj duke nxjerrë një pistoletë e kërcënuar policët të cilët iu përgjigjën me zjarr duke e neutralizuar.
Dy kalimtarë u plagosën nga sulmi me thikë i agresorit e dy të tjerë u plagosën nga plumbat rikoshetë gjatë shkëmbimit të zjarrit me policinë, sipas burimeve policore.
Arsyet që e shtynë 36 vjeçarin drejt një akti të tillë janë të panjohura. Ai ishte me precedent penalë për vrasje e kishte dalë nga burgu në tetor 2018. Sidoqoftë policia franceze po heton edhe pistën e terrorizmit.
/abcnews.al
