kthim

e1963058-4741-4265-a20d-998f25011453.jpg
R D16:34 | 03/12/2019

Kanë nisur negociatat për kthimin e të gjithëvë fëmijëve shqiptarë që ndodhen në kampin Al-Houl në Siri. Lajmi konfirmohet për Abc News nga Konsulli i Nderit i Përgjithshëm i Republikës së Shqipërisë në Liban, Mark Ghraib.

Pas suksesit në rikthimin e shqiptarit, Alvin Berisha nga Kampi Al-Houl në Siri, Mark Ghraib ka marrë autorizimin zyrtar nga autoritetet shqiptare dhe ka nisur negociatat me personat e interesuar për të terhequr qytetarët shqiptarë të cilët janë në Kampin Al-Houl.

Operacioni i shpëtimit do të kryhet për të gjithë fëmijët e të mitur nga mosha 16 vjeç e poshtë.

Gjatë vitit 2012-2014 brenda territorit sirianë janë futur 31 fëmijë shqiptarë bashkë me prindërit e tyre, ndërkohë që 20 të tjerë kanë lindur në Siri nga prindër shqiptarë./abcnews.al

ilir-meta.jpg
ad min10:05 | 16/07/2019

Presidenti Meta ka publikuar mëngjesin e kësaj të marte kthimin për rishqyrtim në Kuvend të ndryshimeve në aktin normativ me fuqinë e ligjit “Për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve”.

Në një sqarim të detajuar 6 faqesh, kreu i shtetit thotë se ky ligj i paraqitur për shpallje është një nismë ligjore e nxituar, jo e plotë dhe fryma e këtij ligji shkon në kundërshtim me kuadrin ligjor aktual në fuqi, pasi kalimi i pronës shtetërore në pronë private drejtohet nga Ministria e Ekonomisë e Financave, ndërsa me ndryshimet e reja, këtë rol e merr Këshilli i Ministrave.

Pikërisht ky delegim tek organi i Këshillit të Ministrave, thuhet në sqarimin e Presidentit është i ndaluar, sipas parashikimeve të ligjit të vitit 2001, i cili kërkon që pronat e paluajtshme publike apo pronat e paluajtshme të shtetit tjetërsohen ose jepen në përdorim sipas mënyrave dhe kufijve të përcaktuar me ligj, dhe jo me vendim të Këshillit të Ministrave.

Kjo situatë, krijon një mbivendosje të asaj që lejohet dhe asaj që ndalohet midis normave rregullatore të nivelit të njëjtë, pra me ligj. Kjo gjendje konkurruese midis normave ligjore krijon rrezikun që në praktikë të krijohet konflikt institucional midis institucioneve shtetërore që zgjedhin ti referohet dispozitave të ndryshme të ligjit për të njëjtin fakt, apo mundësi të keqzbatimit në praktikë të normës të sapomiratuar, thuhet në relacionin arsyetues të Presidentit.

 

Më vonë, Presidenti Meta riktheu për rishqyrtim në Kuvend edhe ligjin për vetëqeverisjen vendore./ABC News Albania 24/7

siria.jpg
ad min19:30 | 24/04/2019

Gjykata e Prishtinës caktoi  “arrest shtëpie 30 dite” për gratë e kthyera nga Siria, nën akuzën e pjesëmarrjes në grupe terroriste. Por, avokatët kundërshtuan masën duke deklaruar se klientet e tyre ishin mashtruar nga bashkëshortët.

I ishte thënë nga bashkëshorti se po udhëtojnë në pushime dhe kanë përfunduar në Siri. Njëra nga të kthyerat nga Siria është arsyetuar para gjykatës se është mashtruar nga bashkëshorti i saj tashmë i vrarë në Siri.

Ajo bashkë me djalin u rikthye në Kosovë para disa ditësh ndërsa bashkë me 31 gra të tjera të riatdhesuara janë të dyshuara për organizim dhe pjesëmarrje në grupet terroriste. Avokatja e saj thotë se prokuroria nuk ka dëshmi se klientja e saj, identiteti i së cilës nuk është bërë i ditur, ka kryer veprat penale me të cilat akuzohet.

Kimete Krasniqi, avokate: “Nuk ka asgjë të vërtetuar se ka kryer vepër penale. E mbrojtura ime ka qenë e mashtruar nga burri, tashmë i ndjerë, që është vrarë pas 3 muaj qëndrim atje”.

Larg syrit të mediave sot ka vazhduar seance dëgjimore për grupin e dytë të grave të kthyera nga Siria. Ndërsa mbrojtja ka kundërshtuar masën e arrestit shtëpiak ndaj tyre.

Arbnora Zeqiri, avokate: “Ne e kemi kundërshtuar këtë masë, duke marrë parasysh edhe rrethanat, shumica prej tyre janë nëna kanë fëmijë, shumicës ju kanë vdekur burrat dhe fëmijët kanë nevojë qe të kujdesen për ta”.

110 persona janë kthyer nga Siria në Kosovë në mesnatën e së premtes dhe së shtunës, 4 prej të cilëve gjenden në paraburgim për shkak të dyshimeve se kanë marrë pjesë në luftërat në Siri, ndërsa 32 të tjera janë gra e 74 fëmijë./abcnews.al

fotografi-1280x663.jpg
ent ela17:35 | 25/01/2019

Fotografi dhe antropologu austriak Robert Pichler, na sjell të dokumentuar Shqipërinë e viteve 90- të me ekspozitën “ Kthim në Kohë”. Autori e cilëson një moment të veçantë në jetën e tij rrugëtimin dhe njohjen e Shqipërisë nga Veriu në Jug. Këto fotografi sjellin aspektin social- kulturore të fillimit të demokracisë në vendin tonë.

Një foto flet më shumë se 1000 fjalë, nga ana tjetër ajo ka fuqinë për të kthyer kohën pas. Portrete njerëzore, situata urbane dhe çaste jete janë disa prej fotografive që sjell fotografi.

Fotografi dhe antropologu Robert Pichler na sjell kohën pas, fillim vitet e demokracisë, kjo është Shqipëria e atyre viteve fiksuar prej objektivit të tij. Rrugëtimin e ka nisur nga Veriu në Jug, për ta ndarë me publikun në Muzeun Historik Kombëtarë.

Udhëtimet e para në vitet ‘92 e nisi në Veri. Fotografi austriak, thotë se eksperienca në Shqipëri i ka shërbyer shumë në krijmtarinë e tij. Madje ai thekson se njohja me shqiptarët e ka frymëzuar së tepërmi.

Krahas fotografive prezantohet edhe një video ku është ceremonia e nderimit të të vdekurit në Malësin e Dukagjinit përmes ritit të xhames , i cili u rikthy menjëherë pas rënies së perdes së hekurt.

Fotografi  na përshkruan të gjitha aspektet e jetës sonë që nga transporti publik, dinamizmin e jeteës, e deri tek ambientet ku jetonin , stilin e jetës  së shqiptarëve të atyre viteve.

Ekspozita “Kthim në Kohë”, Shqipëria e viteve ’90-të e fotografit dhe antropologut austriak Robert Pichler, e kuruar nga Edit Pula,  përmbyllet në Tiranë pas rrugëtimit 18 mujorë nëpër Shqipëri. Ky aktivitet u organizua nga Ambasada e Austrisë në Shqipëri dhe Muzeu Historik Kombëtar./abcnews.al

vlcsnap-error037-1.jpg
ad min15:58 | 26/12/2017

Apeli i Krimeve të Rënda i kthen pasaportën e bllokuar ish-ministrit të Brendshëm, Saimir Tahiri. Përmes një vendimarrje të së martës, Apeli vendosi të shfuqizojë vendimin e Shkallës së Parë të datës 9 dhe 13 dhjetor 2017 për caktimin e masës së sigurisë “ndalim i daljes jashtë shtetit” ndaj tij. Ish-ministri nuk dha asnjë koment mbi vendimin.

Ish-ministri i Brendshëm Saimir Tahiri fitoi një betejë në luftën e tij me drejtësinë. Të martën ai mundi të lirohet nga “ngujimi” disa ditor brenda territorit shqiptar, urdhëruar nga një vendim i Gjykatës për Krimet e Rënda. Ishte Apeli i kësaj gjykate që pranoi kërkesën e ish-ministrit për shfuqizim e masës së sigurisë “ndalim i daljes jashtë shtetit”. I njëjti vendim rrëzoi edhe urdhrin për sekuestrimin e pasaportës dhe kartës së tij të identitetit. Në përfundim të seancës ish-ministri nuk e fshehu buzëqeshjen. Ai nuk komentoi vendimin, ndërsa interesit të gazetarëve iu përgjigj me një urim.

Avokati Maks Haxhia theksoi se paraqiti argumente të reja në gjykatë.

“Nuk ka më nevojë të zbatimit dhe qëndrimit të kësaj mase”.

Në seancën e zhvilluar me dyer të mbyllura, përfaqsuesi i prokurorisë ka kërkuar vazhdimin e masës shtërnguese. Kundër këtij pretendimi është shfaqur ish-ministrit dhe avokatit, të cilët kanë bindur treshen gjykuese se nuk ishte e nevojshme zbatimi i kësaj mase sigurie.
Ish-ministri Tahiri po hetohet nga Krimet e Rënda për akuzën e “trafikut të narkotikëve në kuadrin e grupit të strukturuar kriminal” dhe për “korrupsion i zyrtarëve të lartë”. Bazuar në disa akte të përcjella përmes letërporosive nga autoritetet italiane, prokuroria pretendon se Tahiri ka favorizuar anëtarë të grupit kriminal të Habilajve në trafikun e kanabisit./abcnews.al

Gazetar i ABC News: Armand Bajrami

vlcsnap-error040-1-1280x720.jpg
ad min21:16 | 29/11/2017

218 shtetas shqiptarë janë kthyer në aeroportin “Nënë Tereza” nga vendet e Bashkimit Europian, pasi kishin tentuar të merrnin azil.
Policia e shtetit bën të ditur se 88 prej tyre ishin shqiptarë të deportuar nga Gjermania me avion të posaçëm pasi kishin abuzuar me kërkesa për azil.
Ndërsa 130 të tjetër ishin kthyer nga Franca me vullnetin e tyre.
Drejtorja e Departamentit të Kufirit dhe Migracionit, Aida Hajnaj, u bën thirrje qytetarëve të mos tentojnë këtë mënyrë të largimit nga vendi pasi sipas saj nuk ka asnjë shans për të fituar azil në vendet e Bashkimit Europian./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono