Greqia
ent ela15:05 | 31/10/2019
Athina zyrtare reagoi pas deklaratave të kryeministrit maqedonas Zoran Zaev lidhur me problemet në zbatimin e kësaj marrëveshjeje pas jo-së së BE për dhënien e një date për hapjen e negociatave. Ministri i jashtëm grek Dendias tha se Greqia do vazhdojë të vëzhgojë nga afër plotësimin e kushteve të kësaj marrëveshje.
Greqia do të vazhdojë të vëzhgojë nga afër përmbushjen nga Maqedonia e Veriut të kushteve të vendosura në marrëveshjen e Prespës, tha ministri i jashtëm grek Dendias.
“Zoti Zaev po shfrytëzon edhe njëherë problemet e qenësishme të marrëveshjes së Prespës, të cilat ne i dinim dhe i kishim paralajmëruar tashmë. Marrëveshja tashmë ka dhënë rezultate dhe Maqedonia Veriore korr përfitime pasi rruga për integrimin në NATO është hapur. Qëllimi ynë është të zgjidhim problemet dhe të zbusim pasojat negative të marrëveshjes përmes rrugës evropiane. Për këtë arsye, ne do të vazhdojmë të monitorojmë nga afër respektimin e plotë të përgjegjësive nga fqinjët tanë”.
Dendias kritikoi gjithashtu në deklaratën për Ekathimerinin të martën partinë kryesore opozitare SYRIZA, e cila nënshkroi marrëveshjen me Maqedoninë e Veriut në 2018, duke kërkuar që ajo “të shqyrtojë përgjegjësitë e saj për një “Erga Omnes” problematike, duke përdorur një shprehje latine që do të thotë të drejta dhe detyrime që kanë të bëjnë me të gjithë. Dendias tha gjithashtu se Syriza vazhdon ta paraqesë atë si një arritje.
Dendias e bëri deklaratën pasi kryeministri maqedonas Zaev tha në një deklaratë se pjesë të marrëveshjes që i dha fund një kontesti prej një dekade me Greqinë mund të ishte në rrezik, sepse disa nene lidhen me perspektivën e këtij vendi për anëtarësim në BE. /ABC News Albania 24/7
ad min14:01 | 31/10/2019
Në Prokurorinë e Gjirokastrës ka mbërritur dosja për çështjen e nënës së Kostandinos Kacifasit, ekstremistit grek që u vra nga forcat Renea vitin e kaluar. Tashmë Prokuroria e Gjirokastrës ka afat deri në 15 ditë për të marrë në pyetje nënën e Kacifasit.
Në 1-vjetorin e vrasjes së të birit, nëna e Kacifas lëshoi thirrje anti-Shqiptare. Për këtë rast nisën hetimet edhe nga autoritetet shqiptare. Vasilia Kacifas është 67-vjeçare dhe banon në fshatin Bularat. Gjatë ceremonisë përkujtimore në 1-vjetorin e vdekjes së të birit ajo nuk i kursye fjalët e rënda ndaj Shqipërisë dhe shqiptarëve.
Duke folur në greqisht, në prani të shumë njerëzve, një numër i madh i ardhur nga Greqia pikërisht për këtë rast, ajo ka bërë thirrje për vrasje, dhunë e luftë.
“Tradhtarët. Përse i ndaluan njerëzit të vijnë? Se janë tradhtarë. Thyejuni turinjtë, vrajini, shfarosini. Janë tradhtarë. Nuk ka qeveri këtu. Vorio Epiri është tokë greke, ne jemi grekë. Do luftojmë dhe asgjë nuk do na ndalë. Jam krenare për ty biri im”, ka thënë ajo./abcnews.al
ad min21:32 | 29/10/2019
Në monologun e kësaj të marte në emisionin “Provokacija”, gazetari Mustafa Nano u ndal tek nderimet që bëjnë grekët në varrezat e ushtarëve të tyre në Shqipëri. Sipas tij, që në momentin që u vendos që varrezat e ushtarëve grekë të ngrihen në vendin tonë, ato janë shndërruar në një yçkël më tepër në marrëdhëniet e brishta mes dy vendeve.
Mirëpo, Nano vë në dukje faktin që qytetarët grekë vijnë dhe festojnë çdo vit. Moderatori i “Provokacija” mendon që qytetarëtgrekë mund të bëjnë gjëra më të mençura se kaq. Ai u ndal edhe te përvjetori i Kostandinos Katsifas, që familjarët e tij tentuan ta fusnin në axhendën e festimeve.
Megjithatë, ky plan nuk u eci dhe kjo është jë gjë e mirë sipas Nanos.
Monologu i plotë:
Dje ishte data 28 Tetor. Që është përvjetori i fillimit të luftës italo-greke në vitin 1940. Dhe grekët e përkujtojnë këtë ditë. Ka vite që e përkujtojnë edhe në Shqipëri, që ka qenë territori ku u zhvilluan një pjesë e madhe e luftimeve. E ku një numër grekësh humbën jetën. Këta grekë meritojnë nderim e mirënjohje. Meritojnë nderim e mirënjohje edhe nga ne shqiptarët. Sepse luftuan dhe dhanë jetën kundër fashizmit, që në atë kohë ishte armiku i gjithë botës, dhe miku i ndonjë kolaboracionisti shqiptar që ka nënshkruar sulmin ndaj Greqisë nga pozicioni i kryeministrit.
Pas Luftës së Dytë Botërore, Shqipëria u bë komuniste. Pak më pas, u izolua krejt nga bota. Dhe kështu, për grekët që dhanë jetën në Shqipëri nuk u kujtua njeri. Por pas rënies së komunizmit, kjo çështje ridoli në skenë në trajta të çuditshme. Grekët kërkuan që të rënët e tyre të nderoheshin ashtu si e meritonin. Për këtë, nuk kërkuan që t’i merrnin eshtrat e të rënëve, e t’i nderonin në Greqi. Përkundrazi, kërkuan që të ngriheshin varreza në tokën shqiptare. Dhe autoritetet e këtushme nuk ua prishën. Varrezat u ngritën e po ngrihen. Dhe dihet tanimë se çfarë ka ndodhur. Eshtrat e të rënëve janë shndërruar në një yçkël më tepër në marrëdhëniet tona plot yçkla.
Dhe kështu ndodhi ajo që shumëkush priste të ndodhte. Varrezat u shndërruan në një vend pelegrinazhi për patriotët grekë. Këta të fundit vijnë çdo vit më 28 tetor për të përkujtuar një ngjarje të tyre në tokën shqiptare. Dje, fjala vjen, festuan me pompë 79 vjetorin. 79 VJETORIN. Keni dëgjuar ju të festohet 79 vjetori? Nuk besoj. Robi pret edhe një vit, dreqi ta hajë, që të festojë 80 vjetorin. Dhe pastaj pret edhe dhjetë vjet të tjera, që të festojë 90 vjetorin. Edhe 5 vjet në daçi për të festuar 85 vjetorin. Por jo 79 vjetorin. Mirëpo, duket se në Athinë e bëjnë me qejf këtë gjë. Madje, duket sikur u vjen inat që përvjetorët vijnë kaq rrallë, një herë në vit. Do kishin dashur që të vinin një herë në tri javë, apo njëherë në tre muaj. Dhe vijnë, siç e thashë, me një motivim nacionalist. Fjala e një zv.ministri grek, që kishte ardhur me këtë rast, e demonstronte këtë gjë. “Helenizmi është një dhe i pandarë; prandaj populli është munduar të luftojë për gjithçka që na bën helen”, tha ai. E kuptoni ju? Vjen i biri i botës të përkujtojë një ngjarje antifashiste, dhe flet për helenizmin që duhet mbajtur gjallë. E çuditshme. Mistrece. Bulliste.
Unë gjithnjë mendoj se soji grek është në gjendje të bëjë gjëra më elegante e më të mençura sesa kaq, duhet thënë. Dhe duhet thënë se një gjest e bënë edhe dje, që përveçse ishte 79 vjetori i luftës italo-greke, ishte dhe përvjetori i ekzekutimit të Kacifasit. Familjarët e këtij të fundit, ca nga dhembja, ca ngaqë kanë në kokë idenë fikse se grekët veç vuajnë në Shqipëri, kërkuan të fusnin në axhendën e festimeve edhe Kacifasin. Por askush nuk eci asaj ane. Madje, edhe thirrjeve që synonin heroizimin e Kacifasit nuk iu përgjigj kush. Kjo do të thotë se Athina, por edhe shumica e grekëve të Shqipërisë, nuk e sheh Kacifasin si një patriot grek. Dhe kjo është një gjë e mirë. Me gjithë empatinë që mund të kemi për familjarët e Kacifasit, kjo është një gjë e mirë. Dhe kjo nuk duhet marrë si një gjë që nuk kishte se si të ndodhte ndryshe. Nuk është kështu. Po të kishin mendje të keqe, mund të kapeshin pas hetimit mbi vrasjen e tij që po zvarriten. Por nuk e patën këtë mendje të keqe. Chapeau! /abcnews.al
ad min15:52 | 29/10/2019
Kryeministrat e Greqisë dhe të Shqipërisë janë takuar për gati një orë në Athinë. Pas takimit ata nuk bënë deklarata për mediat.
Në pritje të një deklarate të përbashkët, burime pjesëmarrëse thanë se takimi ishte mjaft konstruktiv dhe u zhvillua në një klimë të mirë. Mendohet se Mitsotakis e Rama kanë diskutuar çështje të marrëdhënieve dypalëshe, përfshirë edhe problemet e nxehta ndërmjet të dy vendeve.
Ndërkohë kryeministri shqiptar ka folur për mediat greke ku është shprehur se Shqipëria është një shembull i shkëlqyer i respektit për të gjithë minoritetet, përfshi edhe grekët.
Gjithashtu kryeministri jonë shpreson që pas progresit të bërë me qeverinë e kaluar greke, puna të vazhdojë dhe të gjendet një zgjidhje e përbashkët për të dyja palët. Një ndër çështjet që foli Rama ishte edhe ajo e Kacifas.
“Besoj se dikush që ecën me një armë në dorë dhe kërcënon jetën e njerëzve është i rrezikshëm”, mësohet të jetë shprehur Rama./abcnews.al
Vladimir Prenga09:48 | 27/10/2019
“Nuk kam vendosur akoma se për cilën kombëtare, Greqinë apo Shqipërinë, do të luaj. Kjo është diçka për të cilën më duhet të mendohem”, shprehej para disa kohësh Kristo Shehu për NovaSport.gr, ndërkohë që e njëjta media raporton se 19-vjeçari është ftuar nga trajneri Edoardo Reja për sfidat me Francën dhe Andorrën, që janë të programuara të luhen në nëntor.
Duke parë faktin që Shqipëria i ka mbyllur llogaritë me çështjen e kualifikimit, tekniku italian synon të rigjenerojë kuqezinjtë. Thuhet se Reja vetë e ka ndjekur lojtarin dhe e pëlqen, ndërkohë që së fundmi një person nga FSHF edhe e ka kontaktuar sulmuesin e Panathinaikos.
Novasport shkruan se Shehu e ka refuzuar ftesën për momentin, por nuk ka dhënë një “jo” përfundimtare. Sulmuesi ka kërkuar që të fokusohet te karriera e tij me Panathinaikos, duke lënë të hapur mundësinë për të luajtur si me Shqipërinë, ashtu edhe me Greqinë. /abcnews.al
ad min09:19 | 26/10/2019
Ditën e sotme do të zhvillohet ceremonia përkujtimore e Kostandin Kaciasit, i cili mbeti i vrarë pasi qëlloi mbi policinë dhe forcat RENEA.
Gazetari Orges Sako raportoi për abcnews.al se deri më tani situata në fshatin Bularat është e qetë. Ai theksoi se në shtëpinë e Kostandin Kacifasit janë me qindra persona të cilët më pas do t’i drejtohen kishës për meshën.
“Bëhet fjalë për një numër 250 persona të cilët ndodhën në shtëpinë e të ndjerit për të kryer shërbimet mortore. Më pas do të nisen në kishën Bularat për të kryer meshën mortore. Është situatë e qetë. I vetmi incident që mund të thuash është që mediat shqiptare të futen brenda ambienteve të Kishës për të transmetuar”, tha Sako.
Familjarët e Kostandin Kacifasit janë ende në shtëpi. Sipas gazetarit pritet që ata të kenë një prononcim ku do t’i kërkojnë shtetit zbardhjen e të vërtetës për vrasjen e të afërmit të tyre.
Me rastin e ceremonisë përkujtimore për minoritarin grek gjatë 24 orëve te fundit kanë hyrë 1800 shtetas grekë nga Pika Kufitare e Kakavijës. Mësohet se ndër ta 3 prej tyre janë persona nongrata dhe 7 personave iu është refuzuar hyrja, pasi nuk përmbushnin qëllimin e udhëtimit.
Më 28 Tetor 2018 Kostandinos Kacifas qëlloi me armë ndaj efektivëve dhe nuk iu bind thirrjes për t’u dorëzuar, por ka bërë disa orë rezistencë me plumba. Ai u vra nga forcat RENEA. Incidenti nisi paraditen e asaj dite pak minuta para se në këtë zone të zhvillohej ceremonia e festës kombëtare e Greqisë./abcnews.al
nev ila09:27 | 23/10/2019
Kryeministri i greqisë Kyriakos Mitsotakis është shprehur më në fund për qëndrimin e Greqisë në lidhje me hapjen e negociatave me Shqipërinë dhe Maqedoninë e Veriut. Mitsotakis është shprehur se Greqia do të monitorojë nga afër detyrimet e fqinjve. Ndërsa për Shqipërinë Mitsotakis u shpreh se si parakusht për Shqipërinë, është respektimi i pakicës greke.
“Greqia është në favor të rrugës evropiane të Ballkanit Perëndimor, jo vetëm sepse ajo e shndërron perspektivën në një faktor të stabilitetin në rajon“, tha Mitsotakis gjatë një darke zyrtare.
“Akoma besoj se Marrëveshja e Prespës ishte një marrëveshje negative për vendin tonë, por nuk do ta fyej stemën dhe as nuk do ta ekspozoj vendin në aventura,” tha ai.
“Greqia është në favor të rrugës evropiane të Ballkanit Perëndimor, jo vetëm sepse ajo shndërron perspektivën në një faktor stabiliteti në rajon, por edhe sepse është një levë demokratike për modernizimin e nevojshëm të fqinjëve tanë dhe për zgjidhjen e çështjeve tona bilaterale“, deklaroi ai.
Lidhur me Shqipërinë, ai ngriti çështjen e respektit për pakicën Greke dhe të drejtat e saj, duke thënë:
“Si me të gjithë, me Shqipërinë, ne kërkojmë marrëdhënie të mira fqinjësore. Sidoqoftë, parakushti për përparimin e përbashkët për të ardhur në një pikë për rrugën evropiane të Shqipërisë është respektimi i pakicës Greke dhe të drejtat e saj “, deklaroi kryeministri grek./abcnews.al
Autor E09:06 | 17/10/2019
Prej muajsh raportet mes Turqisë dhe Greqisë janë të tensionuara. Grekët raportojnë vazhdimisht futje të avionëve turq në hapësirën territoriale të tyre, për të cilën vazhdon debati për gati një shekull me turqit.
Zonat më të prekura janë ato kufitare, siç është për shembull ishulli grek që sheh përballë Turqisë, Oinousses.
Grekët lokalë kanë gjetur një mënyrë për t’iu përgjigjur sipas tyre provokimeve turke duke ndërtuar një flamur gjigant në majën e malit të ishullit, raporton abcnews.al.
Bëhet fjalë për një flamur me sipërfaqe 6 dynim, i cili u ndërtua për disa muaj me punë vullnetare, siç raportojnë mediat greke.
“U deshën disa muaj që të hiqeshin gurët, të shtroheshin gurë të rinj dhe të lyheshin me ngjyrë të bardhë dhe blu”, raporton Protothema. /abcnews.al
nev ila15:03 | 08/10/2019
Gjithçka nisi nga një telefonatë anonime që mbërriti te Autoritetet Portuale të Selanikut natën e 2 gushtit.
“Një person i panjohur telefonoi Byronë e Speciale të Antidrogës duke njoftuar se në pjesën frigoriferike të një kontenieri me banane që vinte nga Ekuadori kishte një sasi të madhe kokaine të fshehur. Menjëherë pas kësaj u bë një kontroll i kontejnerëve brenda portit të Selanikut (SEBO) dhe në motorin e frigoriferit u gjetën 47 pako me 51 kg kokainë“. Kështu e nis shkrimin media greke Kathimerini.
Sipas Kathimerini, autoritetet greke ishin ata që iniciuan hetimin ndërkombëtar të operacionit të shumëpërfolur “Quito”.
Ky ishte fillimi i një hetimi të vazhdueshëm që ka çuar në sekuestrimin e më shumë se 700 kg kokainë të fshehur në frigoriferë dhe në muret e 12 konteinerëve të bananeve nga Ekuadori të destinuara për Pireun, Selanikun dhe Durrësin.
Që nga sekuestrimi i parë, hetimet sekrete janë zhvilluar në Greqi ku qindra konteninerë të ardhura nga Ekuadori janë kontrolluar me pajisje me rreze x. Zhvillimet e fundit hetimore vazhduan më pas jo më në Greqi, por në Shqipëri.
Një prej kontenierëve që vinte nga Ekuadori, u lejua të vazhdonte rrugën e mbikëqyrjes nga Pireu me destinacionin e tij përfundimtar, portin e Durrësit.
Natën e 19 shtatorit kontenieri ndërsa qëndroi për tetë ditë në portin e Durrësit, një person ishte afruar dhe kishte marrë ngarkesën brenda kontenierit. Menjëherë pas kësaj me një autoveturë private personi sëbashku me një bashkëpunëtor tjetër u larguan nga porti.
Njëzet minuta më vonë, pasi kontrolluan ngarkesën zbuluan se kokaina ishte zëvendësuar me oriz duke kuptuar se po ndiqeshin dhe se kishin rënë në një kurth. Ndjekja pasoi dhe policia shqiptare përfundimisht arriti të arrestojë dy nga tre të dyshuarit, ndërsa porositësi arriti të shpëtojë në mënyrë misterioze.
Operacioni i policisë shqiptare u kodua me emrin “Quito”, i cili i referohet kryeqytetit të Ekuadorit nga ku filloi udhëtimi i drogës.
Edhe pse hetimet në Shqipëri dhe Greqi nuk janë mbyllur, hetuesit janë të sigurt se pas importeve të kokainës nga Amerika Latine në Europë është mafia shqiptare. Raportet e fundit në shtypin shqiptar, në të vërtetë, shkojnë një hap më tej, duke treguar dy organizata kryesore kriminale me qendër në qytetet Fier dhe Elbasan.
Për rreth dy javë, në njërën nga tre kontenierët të ngarkuar me banane në portet e Pireut dhe Selanikut, oficerët e antidrogës zbuluan kokainë të fshehur në pjesën frigoriferike të kontenierit. Shuma totale e sekuestruar vlerësohet të arrijë në 700 kg.
Gjithsesi është çështje ditësh për përfundimin zyrtar të hetimit. Burimet nga mediat greke njoftojnë se shefat e Shërbimit të Njësive Speciale të Antidrogës, Rojet Bregdetare, SODO, policia si dhe zyrtarët e Doganave të Pireut do të mbajnë një konferencë të përbashkët për shtyp të mërkurën e ardhshme 9 tetor./abcnews.al
nev ila22:20 | 01/10/2019
Hapësira ajrore e Maqedonisë së Veriut do të kalojë tashmë nën përgjegjësinë e Greqisë. Në bazë të marrëveshjes së Prespës, do të jenë avionë luftarakë grekë, që do të ruajnë vendin, nga kërcënimet terroriste që mund të vijnë nga ajri.
Avionë luftarakë grekë do të monitorojnë tani e tutje hapësirën ajrore të Maqedonisë së Veriut.
Procesi i quajtur Eir Polising, që realizohet në kuadër të NATO-s, parashikon interceptimin e avionëve që synojnë kryerjen e akteve terroriste ndaj Republikës së Maqedonisë së Veriut.
Marrëveshja përkatëse u nënshkrua në Selanik, nga shefi i shtabit të përgjithshëm të forcave të armatosura greke, gjeneral Kristos Kristodoulou dhe homologu i tij nga vendi fqinj, gjeneral lejtnant Vasko Gjurçinovski.
Në fakt, bëhet fjalë për një akt të paralajmëruar menjëherë pas hyrjes në fuqi të Marrëveshjes së Prespës.
Mediat greke e kanë përshëndetur marrëveshjen, duke theksuar se në këtë mënyrë Greqia mënjanoi lojtarë të tjerë, si Bullgaria apo Turqia, që gjithashtu synonin të merrnin përsipër monitorimin e hapësirës ajrore të Maqedonisë së Veriut.
Me marrëveshjen e tanishme shkon në tre numri i shteteve ballkanike, hapësira e të cilëve monitorohet nga avionë grekë. Përveç Maqedonisë së Veriut, ato janë Shqipëria dhe Mali i Zi./ABC News Albania 24/7
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
