Ardian Mema

Halili-Mema.jpg
Vladimir Prenga08:51 | 15/11/2019

Shkarkimi i Ardian Memës i ka kushtuar Tiranës. Klubi bardheblu, që vendosi të mbyllë bashkëpunimin me trajnerin kryeqytetas për ta zëvendësuar me Julian Ahmatajn, duhet të ulej e të fliste me të për kontratën.

Së fundmi palët kanë gjetur edhe gjuhën e përbashkët për detajet. Sipas asaj që shkruan gazeta “Panorama Sport”, klubi i Tiranës duhet të derdhë në llogarinë e Memës shumën e 30 milionë lekëve.

Mema u largua nga Tirana në muajin tetor, pas humbjes së pësuar me Bylisin. Pas ndeshjes ai lëshoi disa deklarata që normalisht nuk u pritën mirë dhe do të ndikonin në raportin e tij me futbollistët. Në klubin bardheblu prej kohësh ishin të lëkundur dhe u pa e udhës që të bënin një lëvizje në pankinë. /abcnews.al

Mema-1.png
Vladimir Prenga23:20 | 28/10/2019

Afrim Tole dhe Ermal Tahiri kanë analizuar Tiranës në emisionin Pressing në ABC News. të dy ndajnë të njëjtin mendim në lidhje me trajnerin Ardian Mema dhe sipas tyre nuk ishte ai problemi i bardhebluve.

Tole deklaroi: “E nisi Mirë Ahmataj, i uroj suksese. Nuk ishte Mema problemi. Tirana ka vite që ka probleme. U takon atyre që janë afër klubit që të flasin. Nuk i uroj askujt të ketë kohë të vështira, por futbolli është kështu. Një del kampion, të tjerë E kam ndjekur Starovën këtu edhe është e vërtetë që ka presion. Problemet i dinë ata. Tre pikë larg ishte, pse e hoqën”.

Më pas e mori fjalën Tahiri: “Edhe unë them që nuk është probleme i trajnerit. Kishin problemet me kontratat, erdhi trajneri i ri dhe fitoi. U tregua që mund të ndryshohet. Ekipin e kanë, janë skuadër që shënojnë. nëse rregullojnë mbrojtjen mund të marrin rezultate të mira. Një faj ka Mema: kur ke Kërçikun dhe Dokën dhe merr një tjetër mbrojtës të djathtë. Nuk ke pse merr disa lojtarë krahu. Pikët vijnë me ekipet e vogla. Tirana ka edhe lojtarë të rinj, mjaft të mirë, si Çelhaka dhe Ismajlgeci. Janë premtues, nuk them se do mbajnë peshën. Ata po punojnë, po nxjerrin. Ky është problemi i futbollit tonë, të kesh vazhdimësi duke nxjerrë lojtarë”. /abcnews.al

Mema-1.png
Igli Nikolli19:54 | 25/10/2019

Tre lojtarë kanë reaguar pas largimit të Ardian Memës nga pankina e Tiranës. 47-vjeçari qëndroi një vit te bardheblutë (tetorin e kaluar mori drejtimin e ekipit), ndërsa vendin e tij e ka zënë Julian Ahmataj.

Eni Imami, Edon Hasani dhe Dorian Kërçiku nuk i kursyen fjalët e mira për ish-trajnerin. “Profesor, ishte kënaqësi që punuam bashkë për një vit, faleminderit për gjithçka! Suksese dhe faleminderit edhe njëherë“, shkruan Imami.

Postimi i Imamit

Edhe mesfushori shkodran ka fjalë të mira për Memën, të cilit i uron suksese në vazhdim. “Profesor Ardi, kënaqësi të punonim bashkë. Zoti ta bëftë mbarë, suksese dhe mirënjohje për ty“, shkruan Edon Hasani.

 

 

Postimi i Hasanit
Postimi i Kërçikut

Korit të falënderimeve i është bashkuar edhe Kërçiku. “Profesor Ardi, faleminderit për gjithçka që na mësove dhe ato që i dhe Tironës. Zoti ta bëftë mbarë“, komenton mbrojtësi i krahut të djathtë. /abcnews.al

Halili-Mema.jpg
Vladimir Prenga12:32 | 25/10/2019

Ardian Mema nuk doli dje në stërvitje te Tirana dhe ishte e kuptueshme që mes tij dhe klubit bardheblu kishte marrë fund çdo gjë. Humbja në Ballsh, por edhe mënyra se si u pësuan golat bënë që trajneri të mendohej mirë për vazhdimësinë.

Së fundmi Tirana ka dalë edhe me një qëndrim zyrtar, teksa thekson se për shkak të rezultateve jo të mira është mbyllur bashkëpunimi me Memën. “KF Tirana dhe Ardian Mema kanë gjetur marrëveshjen për të mbyllur bashkëpunimin. Pas ecurisë jo të mirë të skuadrës në ndeshjet e fundit, trajneri Mema nuk do të jetë më në krye të bardhebluve. KF Tirana e falënderon trajnerin Ard Mema për kontributin 1-vjeçar në krye të skuadrës”.

Mema zëvendësoi tetorin e shkuar brazilianin Ze Maria. Ftesës së presidentit Refik Halili ai iu përgjigj pozitivisht, duke u larguar nga Flamurtari ku ishte ndihmës i Ilir Dajës. Ai e lë Tiranën në kuotën e 14 pikëve, tre më pak se Partizani kryesues.

Prej kohësh Mema nuk e kishte mbështetjen e drejtuesve, që në mënyrë të sforcuar kishin vendosur të vijonin bashkëpunimin. Pas zgjidhjes së çështjes së kontratës, palët kanë shtrënguar duart. Tanimë Tirana duhet të gjejë një tjetër trajner dhe dy alternativat më të mundshme janë Julian Ahmataj dhe Bledar Devolli. /abcnews.al

ahmataj.jpg
Vladimir Prenga18:08 | 24/10/2019

Ardian Mema dhe Tirana mund të ndahen dhe kanë mbetur vetëm detajet. Tekniku nuk ka dalë sot në stërvitje, ndërkohë që po bisedon me presidentin Refik Halili. Një nga emrat më të lakuar për të marrë drejtimin e Tiranës ka qenë Julian Ahmataj.

Ish-mbrojtësi i majtë është pjesë e panelit të të ftuarve në emisionin “Gol pas Goli” në Supersport dhe ka folur në lidhje me mundësinë që të marrë drejtimin e Tiranës. Ahmataj pranon se në të shkuarën ka qenë opsion për bardheblutë, por për momentin nuk dëshiron të flasë shumë.

“Edhe herë të tjera kam pasur mundësi të jem trajner i Tiranës. Ata kanë menduar të bëjnë zgjedhje të tjera. Nuk është korrekte të flasim tani, pasi Tirana e ka akoma një trajner”, u shpreh Ahmataj mes të tjerash gjatë emisionit. /abcnews.al

Mema-1.png
Vladimir Prenga17:04 | 24/10/2019

Humbja në Ballsh mund të lërë pa trajner Tiranën. Ardian Mema, tekniku i bardhebluve që prej tetorit të vitit të shkuar, nuk ka dalë në stërvitje. Sot bardheblutë po punojnë nën urdhrat e Erion Xhafajt, ndërkohë që mbetet të mësohet se çfarë do të ndodhë me Memën.

Trajneri është nën kontratë dhe i duhet të bisedojë me presidentin Refik Halili. Nga ajo çka Mema tha një ditë më parë, vështirë se palët mund të vijojnë bashkëpunimin. “Të pësosh gol në goditje standarde pa lëvizur njeri, s’ka lidhje me trajnerin. Kushdo të jetë, këtyre golave nuk ka çfarë u bën. Të pësosh gola për mungesë përqendrimi nuk di ç’të them”, u shpreh Mema pas ndeshjes në Supersport.

Gjithsesi ende nuk ka asnjë njoftim zyrtar dhe në orët në vazhdim priten të reja. Tirana renditet në vendin e gjashtë në klasifikim, me 14 pikë të grumbulluara në fazën e parë. Shqetësimi nuk është diferenca me kreun, pasi Partizani ka vetëm tre pikë më shumë. /abcnews.al

ardian-mema-refik-halili1.jpg
Vladimir Prenga12:46 | 24/10/2019

Trajneri i Tiranës, Ardian Mema, ndodhet në pozita të vështira pas humbjes në Superiore me Bylisin. Klubi kryeqytetas është i pakënaqur nga rezultatet, por shkarkimi pengohet nga aspekti financiar.

Në diskutim ka qenë të paktën që prej javës së dytë. Ardian Mema dhe presioni për t’u shkarkuar mbetet një binom i pandarë, gjendje që duket se do të marrë fund me vendimin që pritet nga presidenti Refik Halili.

Humbja në fushën e Bylisit e rëndoi edhe më shumë situatën dhe burime në klubin bardheblu bëjnë me dijë për Abc News se po mendohet që trajneri të zëvendësohet nga Bledar Devolli, drejtuesi i Tiranës U19, dhe ish-trajner i Kastriotit në gjysmën e dytë të sezonit të kaluar.

Përpara emrit të Devollit, te kryeqytetasit u diskutua kandidatura e Julian Ahmatajt, ish-trajner i Luftëtarit vjet dhe po ashtu ish-teknik i Kamzës dy edicione më parë. Sipas burimeve në klub, Mema nuk është shkarkuar së pari për shkaqe financiare, pasi presidenti do të ishte i detyruar ta paguante sipas kontratës, diçka jo e lehtë për vetë situatën e borxheve që ka Tirana.

Pozitat e trajnerit u forcuan në javët e para të Superiores, kur u arritën tri fitore në 4 ndeshje. Gjithçka nisi të përkeqësohej me humbjet ndaj Kukësit e Partizanit, po ashtu edhe nga barazimi në Vlorë me Flamurtarin.

Madje, burimet në klub shprehen se Mema u largua pas disfatës në derbi dhe ishte vetë presidenti Halili që i shkoi në shtëpi duke e ftuar që të kthehej. Tirana vazhdimisht ka pasur paqëndrueshmëri me stolin dhe që nga viti 2015-të në detyrë kanë qenë 4 trajnerë.

Ilir Daja u shkarkua në nëntor 2016, pas një viti në detyrë. Pasardhësi i tij, Mirel Josa, u largua në fund të sezonit, kur ekipi ra nga Superiorja. Në vend të tij erdhi në qershor 2016 braziliani Ze Maria, që drejtoi bardheblutë në Kategorinë e Parë, por u largua në tetorin e vitit të kaluar, i zëvendësuar pikërisht nga Mema. /ABC NEWS 24/7

Mema.png
Vladimir Prenga15:18 | 23/10/2019

Tirana dështoi në Laç. Bardheblutë u mundën 3-1 nga Bylisi kryesues dhe zhvilluan një ndeshje jo të mirë. Ardian Mema analizon humbjen në transfertë dhe tregon se çfarë nuk shkoi në ekipin e tij në prononcimin e dhënë për emisionin “Gol pas Goli” në Supersport.

DISFATA – “Nuk do thosha se ishte humbje e merituar. Problemet i patëm të mbrojtësit. Përgatitesh dhe e pëson për një mungesë qëndrimi. Ia dhuruam ne, nuk është se po na sulmonin me forca të shumta. Ata luanin fort për topin e parë dhe të dytë. Më vjen keq, të tre golat i kemi dhuruar. Ato momente duhet përqendrim, është turp t’i pësosh. Nuk di si t’ia vë emrin”.

“Zgjedhjet e bëra? Nuk është ai problemi. Të pësosh gol në goditje standarde pa lëvizur njeri, s’ka lidhje me trajnerin. Kushdo të jetë, këtyre golave nuk ka çfarë u bën. Të pësosh gola për mungesë përqendrimi nuk di ç’të them”.

SITUATA – “Sikur të merrja edhe lojtarë akoma më të mirë, nëse veprohet si sot, apo si më parë, do mundesh. Nuk është çështje menaxhimi të keq. Them se e kemi bërë mirë. Nuk jemi shkëputur nga kreu, kampionati është i gjatë. Tirana ka sulm të mirë, nuk do vuajë. Problemi është mungesa e përqendrimit”.

PROBLEMI – “Tirana nuk ka pasur shpirtin e vet të garës. Këtu bie dakord me ju. Nuk kam më asgjë tjetër për të thenë”, u shpreh Mema. /abcnews.al

mema-1280x853.jpg
Vladimir Prenga16:16 | 22/10/2019

Ardian Mema, trajneri i Tiranës, para ndeshjes me Bylisin ka dalë para mediave dhe ka folur për shumë çështje. Edhe pse luhet jashtë, kreu i pankinës bardheblu nuk druhet: “Të gjitha ndeshjet janë njëlloj, brenda e jashtë. Tani ka kushte të mira, mund të luash sepse janë fushë të mira. Pra dalin në pah cilësitë. Në Ballsh kanë fushë të mirë dhe në lë të luajmë dhe të tregojmë vlerat tona. Nuk ka të bëjë fjala transfertë. Me rëndësi është që të bëjmë punën si duhet”.

BARAZIMI NË VLORË – “E kam sqaruar edhe më përpara. Ishte fat i keq në Vlorë, nuk e justifikoj as veten dhe as lojtarët. Fati është pjesë e lojës. Ekipi ka vlera, mban topin, krijon raste. Kemi pësuar disa gola, që nuk duhej. Me Kukësin kemi pësuar gola të merituar nga kundërshtari. Ka keqardhje për pikët e lëna në Vlorë. Kampionati është i tillë. Ne kemi luajtur mirë me pjesën më të madhe të skuadrave. Futbolli nuk të fal po humbe përqendrimin”.

ZËRAT PËR LARGIM – “Ndoshta pritshmëritë janë të mëdha, prite që të fitohet pafundësisht. Mund të kesh moment delikat në kampionat. Ndodh edhe kjo. Gjëra të rëndomta që ndodhin në Shqipëri janë edhe këta. Nuk jam i pari që bie pre e fjalëve, e kanë provuar kudo në gjithë futbollin tonë. Vjet ishte prova ime. Loja është fytyra e një trajneri. Ndaj edhe rinovuam kontratën. Pres të jemi në tre ekipet e para. Duhet t’i shohim dhe t’i themi gjërat tamam, siç janë. Ajo periudhë iku, por mund të rikthehet. Jemi vend i vogël dhe një fjalë e një njeriu me peshë mjafton që të nisin parashikimet. Në punë më mbajnë rezultatet, asgjë tjetër”.

RIVALËT  – “Pesë ekipe janë shumë të forta. Ne, Teuta, Kukësi, Partizani dhe Partizani. Edhe Laçi është ekip shumë i fortë, edhe pse fituam. Kanë lojtarë të mirë. Këto do jenë ekipet më të cilat do rivalizojmë. Do jemi në garë deri në fund me këto ekip. Harrova edhe Bylisin, që është një ekip me përbërje shumë të mirë. Janë lojtarë që kanë shumë dëshirë dhe mendoj se në çdo ekip që do të luajë atje do të ketë probleme. Ata të nxjerrin probleme dhe t’i fitojnë ndeshjet. Kanë shumë dëshirë dhe personalitet. Japin gjithçka për të fituar. Shkojmë atje për të marrë rezultat pozitiv, pro duhet shumë djersë. Duhet të japim çdo gjë në fushë”.

TRE TRANSFERTAT – “Të tria ndeshjet janë shumë të rëndësishme. Nëse i kalojmë këto, do dalin tre të tjera. Duhet të shohim ndeshjen e radhës dhe ta menaxhojmë si duhet, për të kapur rezultate pozitive. Kjo të sjell mundësi të ngjitet ekipi”.

GABIMET NË MBROJTJE – “Nuk është njëlloj si vjet. Kundërshtarët na sulmojnë dhe me cilësitë e tyre mundet të na shënojnë. Vjet kemi falur vetë, s’kishte nevojë të na sulmonte kundërshtari”.

RECETA E TITULLIT – “Nuk na mungojnë cilësitë për të dalur kampionë. Duhet menaxhim dhe të jemi të thjeshtë. Nuk dilet kampion po të bësh vetëm dy orë stërvitje. Thjeshtësia do na bëjë të qëndrojmë lart dhe të dalim kampion”. /abcnews.al

mema-1280x853.jpg
Vladimir Prenga20:42 | 18/10/2019

Tirana është gati për ndeshjen me Laçin dhe sot para mediave ka dalë trajneri Ardian Mema, i cili ka folur për situatën në skuadrën e tij dhe kundërshtarin e radhës. Ai e pranon se ka njëfarë presioni, sikurse nga ana tjetër u bën thirrje drejtuesve që të transmetojnë qetësi.

PRESIONI – “Si fillim po flas për veten, jo se nuk më intereson kundërshtari. Ndeshjet e fundit kanë sjellë disi presione në skuadër, aq më tepër te unë. Nuk flas në emër të skuadrës por në emrin tim. Kjo më vë mua disi në presion, sepse pretendohet që ndeshjet e Tiranës të fitohen. Ekipi ka luajtur shumë mirë, nuk ka pasur probleme tekniko-fizike dhe tekniko-taktike. Thjesht nuk na ka ndihmuar edhe fati, po t’i shikosh të tria ndeshjet që kemi lënë pikë. Kjo mendoj se ka ardhur nga kërkesa që ka një klub si Tirana për të mos lënë pikë në asnjë ndeshje. Megjithatë unë fajësoj fatin, pasi ekipi realisht ka luajtur mirë.  Duhet të jemi më të kujdesshëm dhe më të përqendruar, të gjithë bashkë, që të mos pësojmë ato gola që ekipi ka pësuar në këto ndeshje”.

BARAZIMI ME FLAMURTARIN – “Ndonjëherë çdo njeri mendon edhe të mirën, edhe të keqen. Po flas si teknik dhe ekipi është shprehur goxha mirë në fushë. Me një anë të keqe mendore dhe kur ke presion, nuk ndodh që të administrosh topin, të krijosh raste. Ndoshta edhe humbja e rasteve, apo kërkimi me çdo lloj forme, duke sakrifikuar gjithmonë, ka bërë që lojtarët të mos jenë fokusuar para porte. Kjo mund ta ketë futur ekipin në presion, duke qenë gjithmonë primar rezultati. Në fund për këtë paguhemi”.

Flamurtari-Tirana, foto nga ndeshja | Foto: Kftirana.al

HUMBJA BARAZ ME LARGIM – “Kjo pyetje më është bërë që pas ndeshjes me Kukësin, kur ekipi pësoi humbjen e parë. Ndoshta te ky klub, gjërat bëhen pak tragjike. Ka edhe një të drejtë. Edhe unë do kërkoja me insistim që Tirana të fitonte ndeshjet e të shpallej kampion. Kjo është pjesa që në klub janë nervozë, si edhe tifozët. Pritshmëritë janë të larta. Ndodh që një klub ka një projekt dhe unë e mendoj se projekti duhet çuar deri në fund. Pjesa tjetër, ku që ndeshjen e parë apo të dytë, ku diskutohet direkt kjo pyetje, do i bëjë dëm të gjithëve, edhe futbollistëve. Ndonjëherë jemi mundur edhe për gabime foshnjarake.

Unë e shoh lojën si teknik dhe më intereson si luan ekipi. Edhe po të luante keq dhe të fitonim në fund do më interesonte. Një ekip, nëse luan mirë, do i rikthehet fitoreve. Nëse nuk mbajmë topin dhe nuk luajmë mirë, kjo nuk të jep garanci për të ardhmen. Fakti që është edhe 100-vjetori i klubit, na vë pak në presion. Unë nuk jam magjistari apo profeti i futbollit, që të them se nesër do fitojmë dhe do largohem kur të dua unë. Drejtuesit duhet ta kuptojnë se klubit i duhet qetësia. Duhet të shikojmë nga e ardhmja. Nëse gjërat na dalin nga kontrolli, do kemi edhe probleme. Kemi qenë pushim këto kohë, tani do e shohim nesër në fushë”.

Sulejman Starova

NDËRRIMI I TRAJNERIT – “Nuk do thosha nëse e dua Laçin me Starovën apo dikë tjetër. Laçi kishte një lloj fizionomie te loja e vet dhe pak a shumë e dinim mirë. Sula e ka drejtuar Laçin që vjet dhe e dimë si luajnë. Gjithesesi dimë edhe si luan Cungu. Do e kishim më të thjeshtë për ta përgatitur ndeshjen me Sulën. Çdo trajner i ri ka edhe kërkesat e veta të reja. Do e kemi më të vështirë me Cungun nesër. Jo se ndryshon ana profesionale e tyre, por se dinim stilin e lojës”.

REZULTATI PA LOJË – “Unë do bëj punën time, që ekipi të shprehet mirë në fushë dhe të jetë dominues ndaj kundërshtarit. Ky është futbolli, ndoshta të gjëmon edhe disfata. Kur lë pikët, të vjen keq. Po të shohim 26 minuta me Partizanin, askush nuk mendonte se Tirana do pësonte dy gola për 5 minuta. Çdo gjë po fliste për ne. Pas ndeshjes i thashë lojtarëve se nëse luani kështu, jeni mirë.

Duke qenë se kemi pasur fatin e keq, duhet të kemi akoma më shumë përqendrim. Nuk kemi një kundërshtar që na ka mbajtur në fushën tonë. Fati është pjesë e lojës. Nuk duhet t’ia lëmë gjërat në dorë të fatit. Ca punë duhet t’i bëjmë akoma më mirë. Kjo nuk është për të justifikuar lojtarët, por për t’i vënë me këmbë në tokë që të jemi më të përqendruar. Jo me një rast sporadik të na mundë çdo ekip”.

MUÇI – “Jam munduar t’i jap minuta Nestit. Ndeshjen e fundit me Flamurtarit nuk i dhashë minuta, por pjesën dërrmuese të ndeshjeve e kam futur nga stoli. A duhet klubi apo unë t’i japim më shumë minuta? Kjo është e drejtë. Edhe vjet jam munduar që ta fus. Kemi qenë edhe në situata të vështira për rënien nga kategoria. Mund ta fillojë edhe nga formacioni.

Muçi, gjatë një ndeshjeje me Tiranën

Mendoj se gradualisht, duke marrë nga pak minuta, do bëhet lojtar formacioni dhe të mos dalë më. Duke qenë se pikët janë me rëndësi, shpeshherë nisemi edhe me emocionet e pikëve. Muçi nuk ka nevojë për përkrahjen time, sepse shumë shpejt do jetë pjesë e lojës. Ai duhet të bëjë përpjekje më të mëdha, që të na e mbushë mendjen që të jetë pjesë e formacionit.

RIVALITETI ME LAÇIN – “Një vit kam këtu. Mendoj se ndeshjet me Laçin kanë qenë të forta. Është ekip me ekuilibër. Të godet në momente të caktuara, me lojtarë të mirë. Këtë ekip vjet e kemi pasur problem. Nuk është se na pritën miqësisht. U treguan të egër me ne. Ne nuk kemi armiq, por kemi kundërshtar. Çdo ndeshje e konsiderojmë kundërshtarin sipas radhës, por nuk i ndajmë, i mirë apo i fortë, në kuptimin e egërsisë. Laçi ka ekip të mirë dhe nuk duhet të kishte aq pikë sa ka. Nesër në ndeshje do jetë e luajtur fort. Shpresoj të kemi fat e të mos pësojmë gola që nuk duhej t’i pësonim.

ORARI I NDESHJES – Normalisht, në orën 17:00 është edhe më freskët, ka më tepër oksigjen. Luhet më shpejt. Dreka është disi problematike. Ndeshjet e ardhshme do i kemi në orën 13:00. Nuk është një orë që ka ritëm loja. Bie ritmi nga dielli, nga koha. Me lojtarët themi që koha apo dielli, është njësoj për të dyja, edhe fusha”. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono