Aleksandar Vuçiç

serbia.jpg
ad min15:54 | 06/09/2018

Beogradi këmbëngul se nuk do të të njohë pavarësinë e Kosovës, ndërkohë që të premten pritet në Bruksel takimi i rradhës mes presidentit të Kosovës Thaçi dhe atij Serb Aleksandër Vuçiç.

Një ditë para bisedimeve në Bruksel, në Beograd thonë se pozita ndërkombëtare e tyre ka ndryshuar dhe se në Prishtinë nuk duhet të presin që të marrin njohje nga Serbia apo ulëse në OKB. Idetë e tanishme janë vetëm ide pasi dialogu është ende i hapur. Një deputet i partisë së presidentit, Alleksandar Vuçiç, thotë se Presheva nuk është çështje e hapur për Serbinë. Ekspertët thonë se zgjidhja etnike nuk është e mirë, por duket si rruga e vetme për vendosjen e marrëdhënieve shtetërore.

Kufij të rinj në Ballkan apo ku do të shkojë dialogu mes Kosovës dhe Serbisë. Shumë serbë e presin vizitën e presidentit, Aleksandar Vuçiç, në Mitrovicë për ta dëgjuar idenë e tij më saktë. Thonë se presin zgjidhje. Deputetët nga partia e tij besojnë se pozita e Beogradit është më e fuqishme edhe në Uashington. Tema e statusit është hapur sërish dhe Presheva nuk është temë e hapur për Serbinë. Mitrovica pret fjalë të mëdha.

Milovan Drecun, anëtar i Këshillit për Kosovën, Serbi: “Gjëja kryesore aktualisht është se duhet një zgjidhje për paqen, dhe ajo duhet të jetë afatgjatë si rezultat i marrëveshjes përfundimtare mes palëve kompromisit. Në të ardhmen duhet vendosur se si do të arrihet kjo. Për momentin nuk ka asnjë pikë tjetër për tu marrë për shembull, për të cilën Thaçi dhe Vuçiç të bien dakord”.

Vuçiç do të shkojë në Kosovë pas takimit në Bruksel për vazhdimin e bisedimeve. Kishte premtuar disa herë që idenë e tij do ta nxjerrë në referendum. Dushan Spasojeviç, nga Fakulteti i Shkencave Politike në Beograd, thotë se saktë se çfarë do të ndodhë nuk e di askush. Por, zgjidhja është e vështirë.

Dushan Spasojeviç, Universiteti i Beogradit: “Përkufizimi mund të shtyjë më përpara vendosjes së një lloj marrëdhënieje mes dy vendeve. Por kjo jo në nivel popujsh, pasi për këtë duhet ende punë. Dhe për më tepër nuk shoh interes për përmirësim. Por bëhet fjalë për marrëdhënie formale si dy shtete apo komunitete politike. Pyetja e dytë është si do të ndikojë kjo në rajon”.

Televizionet serbe kanë paralajmëruar maratonë transmetimi pasi ajo që thuhet në Mitrovicë pritet të jetë plani i qartë për Serbinë dhe rruga me vijat e kuqe për negociatat e zgjidhjes përfundimtare./abcnews.al

75F0A85E-517D-4383-A76C-FB90BBB14313_w1023_r1_s.jpg
ent ela09:43 | 21/08/2018

Presidenti i Kosovës, Hashim Thaçi dhe ai i Serbisë, Aleksandar Vuçiç, pritet të takohen në fillim të muajit të shtator.

Përderisa nuk dihet nëse në këtë takim do të jetë apo jo temë diskutimi ideja për korrigjim të kufijve, partitë opozitare në Kosovë nuk janë të bashkuara në kundërshtimin, ndonëse që të gjitha janë deklaruar kundër një iniciative të tillë.

Gjithsecila nga partitë opozitare, Lidhja Demokratike e Kosovës, Lëvizja Vetëvendosje dhe Partia Socialdemokrate shprehen të gatshme të bashkëpunojnë mes vete, mirëpo ende nuk kanë një plan se si të veprojnë bashkërisht.

Deputeti i LDK-së, Driton Selmanaj thotë se janë në kontakt me Vetëvendosjen dhe nuk përjashton mundësinë e arritjes së një qëndrimi të përbashkët opozitar.

“Me fillimin e sesionit të ardhshëm vjeshtor do të hyjmë në një proces të brendshëm konsultativ të partive politike opozitare për të parë se cilat nga format e përbashkëta të reagimit mund të sjellin efikasitet për ta ndalë, e para edhe vazhdimin e negociatave, e mos të flasim për t’i ndalë edhe këto aventura të rrezikshme për shtetin”, deklaroi deputeti Selmanaj për Radion Evropa e Lirë.

Në Vetëvendosje janë të gatshëm për bashkëpunim, mirëpo thonë se kjo nuk nënkupton përfshirjen e këtij subjekti politik në ndonjë grup negociator apo grup uniteti.

Deputeti i Vetëvendosjes, Xhelal Sveçla thotë presidenti i Kosovës, Hashim Thaçi nuk është person që përfaqëson interesant e qytetarëve të vendit.

“Hashim Thaçi nuk mund të udhëheqë me çfarëdo delegacioni, apo çfarëdo bisedimesh me Serbinë për shkak se kemi përvojë të keqe me të. Për shkak se ai vetë është person i cili ka dëshmuar se për interesa të tij private është i gatshëm që të sakrifikojë interesat e këtij vendi, edhe për shkak se nuk është një figurë e cila përfaqëson unitetin politik të këtij vendi edhe strukturave të saj politike. Kurse, për sa i takon opozitës, ne jemi duke u koordinuar me Lidhjen Demokratike të Kosovës për hapat e mëtutjeshëm”, tha Sveçla.

Partia Socialdemokrate ditë më parë kërkoi nga partitë e tjera opozitare që të mbështesin iniciativën e saj për thirrjen e një seance të jashtëzakonshme të Kuvendit të Kosovës, për të diskutuar rreth procesit të dialogut mes Kosovës dhe Serbisë.

Shefi i grupit parlamentar të PSD-së, Dardan Sejdiu mohon të kenë gjetur përkrahje apo gatishmëri nga LDK-ja dhe Vetëvendosja për bashkëpunim.

“Gjithashtu kemi qenë të gatshëm që edhe në iniciativa të tjera, qoftë ajo nga LDK-ja, qoftë nga Vetëvendosje të bashkëngjiten, por përsëri nuk ekziston vullneti i koordinimit nga këto dy subjekte. Thjesht, secila mbanë qëndrim, themi kështu të tyre, të cilat nuk janë se po japin ndonjë ide për të ecur përpara. Thjesht janë qëndrime të ngurta dhe qëndrime të cilat po i lejojnë presidentit Thaçi, që të vazhdojë më këtë retorikë, e cila, fatkeqësisht nuk na çon askund”, tha Sejdiu.

Muhaxhiri: Opozita pret më shumë qartësi nga ndërkombëtarët

Ky mosunifikim i opozitës, sipas analistit politik, Artan Muhaxhiri po ndodh për shkak se opozita kosovare është duke pritur një qëndrim më të qartë të faktorit ndërkombëtar.

“Kjo temë e ka zënë opozitën kosovare krejtësisht të papërgatitur dhe për këtë arsye nuk ka një qëndrim, të unifikuar dhe të strukturuar të saj në raport me idenë e presidentit Thaçi. Pra, çështja kryesore është se opozita kosovare është në mes të frikës për suksesin e idesë së presidentit Thaçi dhe kritikave të bashkësisë ndërkombëtare. Është një gjendje e papërcaktuar në raport me këtë ide”, tha Muhaxhiri.

Sipas tij, qëndrimi i përbashkët i opozitës dhe unifikimi në këtë fazë të bisedimeve, do të prodhonte efekt pozitiv, porse, derisa të qartësohet se çfarë do të jetë reagimi ndërkombëtar, një gjë e tillë është e pamundur.

Presidenti i Kosovës Hashim Thaçi u kundërshtua nga të gjitha subjektet politike si dhe nga shumë shtete evropiane, mbështetëse të Kosovës, në idenë e korrigjimit të kufijve.

Ditë më parë, presidenti Thaçi deklaroi se deri në muajin shkurt të vitit të ardhshëm pritet të arrihet marrëveshja përfundimtare për normalizim të marrëdhënieve mes Kosovës e Serbisë. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono