Zëdhënësi i zyrës humanitare të OKB-së, Jens Laerke, tha se vetëm 11 për qind e Rripit të Gazës nuk është e përfshirë nga urdhrat e evakuimit.
Duke folur në një konferencë të OKB-së në Gjenevë, Laerke tha se që nga e premtja, ushtria izraelite lëshoi tre urdhra të rinj evakuimi “për mbi 19 lagje në Gazën veriore dhe në Deir al-Balah, me më shumë se 8.000 njerëz që qëndrojnë në këto zona, shumica prej të cilëve janë strehuar në lokacionet për zhvendosje”.
Numri i urdhrave masive të evakuimit vetëm në gusht u rrit në 16, tha Laerke, duke shtuar se këto urdhra prekën edhe stafin e OKB-së dhe stafin humanitar, organizatat joqeveritare si dhe ofruesit e shërbimeve, “së bashku me familjet e tyre”.
“Këto zhvendosje u bënë në një njoftim shumë të shkurtër dhe në kushte të rrezikshme. Kolegët tanë humanitarë në terren janë veçanërisht të shqetësuar për urdhrin e lëshuar të dielën”, tha ai.
Laerke tha gjithashtu se kalimi kufitar Kerem Shalom ishte “teknikisht i hapur për hyrje, por është shumë e rrezikshme që organizatat humanitare të shkojnë atje dhe të marrin çfarëdo ndihme që po sillet pikërisht përtej kufirit”.
Izraeli ka vazhduar ofensivën e tij brutale në Rripin e Gazës pas një sulmi nga grupi palestinez Hamas më 7 tetorin e kaluar, pavarësisht një rezolute të Këshillit të Sigurimit të OKB-së që bën thirrje për një armëpushim të menjëhershëm.
Sulmi ka rezultuar në pothuajse 40.500 palestinezë të vrarë, kryesisht gra dhe fëmijë, dhe mbi 93.600 të plagosur, sipas autoriteteve lokale shëndetësore.
Bllokada e vazhdueshme e Gazës ka çuar në mungesa të mëdha të ushqimit, ujit të pastër dhe ilaçeve, duke e lënë pjesën më të madhe të rajonit në gërmadha.
Izraeli përballet me akuzat për gjenocid në Gjykatën Ndërkombëtare të Drejtësisë, e cila ka urdhëruar ndalimin e operacioneve ushtarake në qytetin jugor Rafah, ku mbi një milion palestinezë kishin kërkuar strehim përpara se zona të pushtohej më 6 maj.
