Zinedine Zidane, trajneri i Real Madrid, u shpreh shumë i lumtur me ndeshjen që të besuarit e tij bënë përballë Barcelonës, në El Clasicon që u mbyll pak çaste më parë. Strategu francez i thuri elozhe të tijve, si dhe pranoi se skuadra mund të merrte më shumë nga kjo sfidë.
“Jam shumë i lumtur për mënyrën si luajtëm sot. Kemi bërë një lojë të shkëlqyer, por kemi humbur disa raste që në një ndeshje tjetër mund t’i kishim konkretizuar me gol. Ne merituam edhe më shumë. Ky është futbolli, kur keni shanse, duhet të shënojmë.
Skuadrës sime i mungonte qartësia në fazën e fundit të fushës, si dhe cinizmi para porte. Megjithatë, jam shumë i lumtur për pikën e marrë në një fushë shumë të vështirë. Nuk jam i shqetësuar për mungesën e golit, sepse gjëja më e rëndësishme është të kesh shanse për të shënuar, pastaj është çështje fati. Lojtarët e mi krijuan shumë raste dhe për këtë jam i lumtur.
Shkoi mirë për të dyja skuadrat, si për ne, ashtu dhe për Barcelonën. Është parë një lojë e mirë futbolli dhe mendoj se mund të jemi të lumtur të dyja ekipet”, përfundoi Zizou./abcnews.al
