Zgjedhjet në Rusi nuk ishin të lira dhe të ndershme dhe u bazuan në shtypje dhe frikë, tha sot shefi i politikës së jashtme të BE-së, Josep Borrell. Sipas tij, 27 vendet anëtare të BE-së do të lëshojnë një deklaratë të përbashkët për zgjedhjet në Rusi gjatë ditës së sotme.
Zgjedhjet presidenciale në Rusi “nuk ishin të lira dhe të drejta”, por u bazuan në “shtypje dhe frikë”, tha Borrell.
Ato u kryen “në një kontekst kufizues, të rënduar nga lufta e paligjshme e agresionit të Rusisë në Ukrainë”, shtoi ai, në deklaratën që dha në emër të Bashkimit Europian.
“Autoritetet ruse kanë vazhduar të rrisin represionin sistematik në Rusi, duke synuar opozitën, shoqërinë civile, mediat e pavarura dhe zëra të tjerë kritikë, ndërsa u janë drejtuar legjislacionit represiv dhe dënimeve me burgim të motivuara politikisht”, theksohet në deklaratë.
Brukseli tha gjithashtu se nuk do të njihte rezultatin e zgjedhjeve të paligjshme në territoret ukrainase nën kontrollin rus, pasi sipas tyre janë të pavlefshme dhe nuk prodhojnë asnjë efekt juridik.
Kujtojmë se Vladimir Putin, i cili u rizgjodh dhe do të qëndrojë në pushtet edhe për gjashtë vite të tjera, sipas rezultateve të deritanishme të zgjedhjeve presidenciale pa opozitë, skicoi portretin e një Rusie që “forcohet” nga fitorja e tij dhe nuk do të “frikësohet” nga kundërshtarët e saj.
/abcnews.al
