Presidenti i Ukrainës, Volodymyr Zelensky deklaroi se Rusia nuk ka arritur ende ta pushtojë qytetin e Bakhmutit.
“Ata nuk ishin në gjendje të kapnin Bakhmutin. Ky ishte operacioni i fundit i rëndësishëm ushtarak që ata donin të përfundonin deri më 9 maj”, tha Zelensky në një konferencë të përbashkët për shtyp me Presidenten e Komisionit Evropian, Ursula von der Leyen.
“Për fat të keq, qyteti nuk ekziston më. Gjithçka është shkatërruar plotësisht”, shtoi ai, shkruan CNN.
Zelensky kërkoi më shumë municion. Presidenti ukrainas tha gjithashtu se municionet që Bashkimi Evropian është zotuar t’i dorëzojë Ukrainës janë tashmë të nevojshme në fushën e betejës, duke bërë thirrje për dërgesa më të shpejta.
“Ukraina çdo ditë demonstron efikasitetin e mbrojtjes sonë kundër agresionit rus. Çdo raketë e përgjuar e terroristëve, çdo sukses i luftëtarëve tanë në mposhtjen e sulmeve ruse, këto janë provat se ne mund të fitojmë mbi këtë agresor,” theksoi Zelensky.
“Gjëja kryesore është proporcionaliteti i aftësive tona me aftësitë që ka agresori. Dhe në këtë kontekst, unë e kam falënderuar Ursulën për gatishmërinë e Bashkimit Evropian për t’i siguruar Ukrainës këtë municion kaq të nevojshëm, një miliard predha artilerie dhe ne kemi diskutuar edhe për çështjet kyçe, shpejtësinë e prokurimit dhe dorëzimit të këtij municioni, sepse ato janë të nevojshme në fushën e betejës tashmë”, u shpreh presidenti Zelensky./abcnews.al
