Çështja e luftës në Ukrainë është çështja më urgjente ndërkombëtare për presidentin e sapozgjedhur të SHBA-së, Donald Trump dhe ai mund ta ndalojë vërtet Putinin, sipas presidentit Volodymyr Zelensky.
“(Trump) më tha në telefon se ai pret takimin tonë. E di që ai ka prioritetet e tij politike të brendshme, por në planin ndërkombëtar më duket se çështja e Ukrainës është një nga më urgjentet për presidentin Trump”, tha Zelensky për prezantuesin amerikan të podkastit Lex Friedman.
Presidenti ukrainas tha se ai e respekton miliarderin Elon Musk dhe do të donte që ai të ishte në anën e Ukrainës sa më shumë që të jetë e mundur.
“Unë e respektoj atë. Së pari, unë respektoj njerëzit e vetë-bërë, i dua njerëz të tillë. Asgjë nuk ra nga qielli, njeriu bëri gjithçka vetë. Kam punuar edhe vetë, e di se çfarë do të thotë të fitosh para, të zgjedhësh njerëz të talentuar dhe të bësh diçka të rëndësishme për njerëz të caktuar”, ka shtuar Zelensky.
Sipas tij, Koreja e Veriut dërgoi 12,000 ushtarë në luftën kundër Ukrainës, nga të cilët 3,800 janë vrarë ose plagosur deri më sot.
Zelensky vuri në dukje se ky vend mund të dërgojë 30-40,000 ushtarë të tjerë në luftë, ose ndoshta edhe 500,000.
“Mund të sjellin shumë njerëz sepse kanë një urdhër të tillë”, tha presidenti i Ukrainës dhe theksoi se Evropa nuk mund të bëjë të njëjtën gjë./abcnews.al
