Presidenti ukrainas, Volodymyr Zelensky theksoi sot, gjatë takimit të tij me liderin e opozitës gjermane, Friedrich Merz, rëndësinë e garancive të sigurisë nga Evropa në çdo negociatë të mundshme për t’i dhënë fund pushtimit të vazhdueshëm rus. Ai tha se Ukraina ka nevojë për garanci sigurie jo vetëm nga NATO, por edhe direkt nga vendet evropiane.
Zelensky pranoi se vendi i tij nuk ka gjasa të pranohet si anëtar i NATO-s në këtë kohë, por kërkoi edhe një herë një ftesë zyrtare për t’u anëtarësuar në aleancë.
Presidenti ukrainas u takua gjatë fundjavës në Paris me presidentin e zgjedhur të SHBA-së, Donald Trump dhe presidentin francez Emmanuel Macron. Zelensky tha se dëshiron të bisedojë me presidentin aktual Joe Biden së shpejti me telefon për të diskutuar anëtarësimin në NATO.
“Sepse ai është presidenti aktual i Shteteve të Bashkuara, dhe natyrisht shumë varet nga mendimi i tij”, tha Zelensky. “Të diskutosh këtë me Trump tani, përpara se të marrë pozicionin e tij në Shtëpinë e Bardhë, nuk ka shumë kuptim.”
Ekziston një shqetësim i gjerë në Ukrainë dhe në mbarë Bashkimin Evropian në lidhje me masën në të cilën Trump do të vazhdojë të ofrojë ndihmë ushtarake për Ukrainën pasi të marrë detyrën më 20 janar.
SHBA ka qenë deri tani mbështetësi më i madh dhe më i rëndësishëm i Ukrainës në luftën kundër një pushtimi rus në shkallë të plotë, i cili filloi në shkurt 2022.
Aleatët evropianë aktualisht nuk duken të aftë ose të gatshëm për të mbushur boshllëkun nëse Trump ndalon ose redukton ndjeshëm ndihma amerikane./abcnews.al
