Ka eksploruar thuajse të gjitha malet në mbarë vendin tonë.
Vasil Çekani nga Gjirokastra, dikur efektiv i shërbimit zjarrfikës, prej vitit 2010 merret me alpinizëm.
E nisi nga dëshira për të njohur Shqipërinë dhe sot aventurat, sa të bukura e aq të rrezikshme janë bërë pjesë e pandarë e jetës së tij.
Udhëtimet i realizon të gjitha në grup. Thotë së përveç vendasve kërshëri për të zbuluar e njohur natyrën e egër të Shqipërisë kanë edhe të huajt.
“Jemi të trajnuar, edhe profesioni im, kam mbi 10 vite që isha në shërbimin zjarrfikës, më ka bërë që ne të mësonim mënyrat e lidhjeve, hedhjeve me litar dhe të transportit me barrelë, nga vendet me terrenet e thyera.”
Ndjesitë që përjeton gjatë ngjitjeve në male janë të veçanta por nuk kanë munguar as momentet e rrezikshme.
“Në Malin e Murganës, mbi fshatin Sotir, ishte terreni me dëborë, fillon ngjitja nga fshati Sotir. Më pas fillon bredhi, nga bredhi e lart kishte dëborë. Dëbora ishte e ngrirë, në majë kur u ngjitëm, e realizuem me sukses. Në zbrotje, njëri rishtaz shkau në pjesën e ngrirë të akullit dhe dëmtoi këmbën.”
Në jug, për të maja më e vështirë është ajo e Papingut.
“Është nga majat më të larta, 2440 metra mbi nivelin e detit. Kjo është një ngjitje shumë e vështirë.”
Falë përvojës që gëzon sot Vasili, është bërë pjesë e Federatës Shqiptare të Alpinizmit
Shqipëria, thotë Vasili, ka shumë për të zbuluar ndaj këshillon, veçanërisht të rinjtë që ta njohin përmes udhëtimeve e alpinizmit./abcnews.al
