Sekretarja e Thesarit e SHBA-së, Janet Yellen tha të martën se Shtetet e Bashkuara dhe Evropa duhet t’i përgjigjen politikave industriale të Kinës në një “mënyrë strategjike dhe të bashkuar” për t’i mbajtur prodhuesit të qëndrueshëm në të dy anët e Atlantikut.
Në komentet mbi rëndësinë e aleancës SHBA-Europiane në Frankfurt, Yellen deklaroi se kapaciteti i tepërt industrial i Kinës kërcënoi si firmat amerikane dhe evropiane, si dhe zhvillimin industrial të vendeve të tregut në zhvillim, shkruan Reuters.
“Politika industriale e Kinës mund të duket e largët ndërsa ne ulemi këtu në këtë dhomë, por nëse nuk reagojmë në mënyrë strategjike dhe të bashkuar, qëndrueshmëria e bizneseve si në vendet tona ashtu edhe në mbarë botën mund të jetë në rrezik”, tha ajo.
Komentet e saj vijnë një javë pasi administrata Biden njoftoi tarifa të reja të larta për automjetet elektrike kineze (EV), produktet diellore, gjysmëpërçuesit, pjesët e baterive, çelikun dhe industri të tjera strategjike./abcnews.al
