Xavi, një legjendë e gjallë e futbollit spanjoll dhe Barcelonës, ka dhënë një intervistë të gjatë për “Super Deportivo Radio” dhe sigurisht që fokusi ka qenë Lionel Messi. Ish-mesfushori nuk është dakord për presionin që ushtrohet tek ai dhe futbollistët e tjerë të kombëtares së Argjentinës.
“Nuk është e lehtë të luash me një vend të tillë, që nuk ka fituar një titull të rëndësishëm prej vitesh dhe me historinë që qëndron pas me Maradonën, i cili është një figurë e madhe dhe shumë popullore në Argjentinë. Dikur flitej për besimin, që është shumë i rëndësishëm. Tani lojtarët e Argjentinës nuk e kanë kur shkojnë në kombëtare, qoftë Messi, qoftë të tjerët. Ata duhet të përpiqen të jenë mendërisht të fortë”, shprehet Xavi.
Shpesh flitet për dështim, por ish-mesfushori thekson se vetëm një fiton në fund dhe kjo nuk do të thotë se të gjithë të tjerët kanë dështuar. “Ka shumë njerëz që flasin për futbollin, por nuk e kuptojnë. Çfarë shikojnë ata? Vetëm rezultatet. Messi ka luajtur në finalen e Kupës së Botës dhe dy herë në finalen e Copa America.
Nuk është vetëm Messi, pasi ai nuk luan vetëm. Është kombëtarja e Argjentinës, që është kompetitive. Nuk janë eliminuar në raundin e parë. Është shumë e vështirë, vetëm një del kampion. A do të thotë kjo që skuadrat e tjera kanë dështuar, janë një katastrofë?”, shton spanjolli.
Për Messin ka pasur shumë kritika, madje edhe nga një legjendë si Maradona, i cili ka deklaruar se sulmuesi i Barcelonës nuk i ka cilësitë e një lideri. Xavi nuk mendon kështu dhe ka një thirrje për të gjithë ata ish-lojtarë që tani vetëm kritikojnë.
“Mesi, për mua është një lider i pabesueshëm në fushë dhe jashtë saj. Ndoshta ai është një lider më i heshtur në dhomat e zhveshjes, por ai është një lider absolut. Ai gjithmonë e do topin, është gjithmonë i gatshëm dhe ka personalitet. Nuk më pëlqen kur ish-lojtarë bëjnë komente të tilla dhe janë shumë kritikë ndaj shokëve të tyre me të cilët kanë ndarë të njëjtin profesion. Ata kanë qenë vetë në ato kushte, i dinë vështirësitë. Nuk i kuptoj kritika të tilla të ashpra për një lojtar, kur e ke provuar edhe vetë të njëjtën rrugë”, është shprehur Xavi. /abcnews.al
