Një vrasje e rëndë ka tronditur qytetin e Gjilanit mbrëmjen e së hënës. Prokuroria thotë se ka dyshime që vrasja ka ndodhur për borxh.
Prokuroria Themelore në Gjilan, ka paraqitur kërkesën për caktimin e masës së paraburgimit, në afat prej 30 ditësh, kundër të pandehurve V.H., E.N., R.I., A.S. dhe B.K., për shkak të dyshimit të bazuar se në bashkëpunim kanë kryer vrasje të rëndë.
Ekziston dyshimi i bazuar se më 08 Nëntor 2021, rreth orës 20:40 minuta, në lagjen “Arbëria’’, në Gjilan, afër shtëpisë së të ndjerit E.R., pas një mosmarrëveshje rreth një borxhi në të holla në mes të pandehurve, të pandehurit me dashje kanë privuar nga jeta tani të ndjerin E.R., në atë mënyrë që të pajisur me dy lloje të armëve të zjarrit, kanë gjuajtur shtatë (7) herë në drejtim të njërit tjetrit, ku nga shkëmbimi me armë zjarri ka mbetur i vdekur i ndjeri E.R., ndërsa plagë të rënda trupore ka pësuar edhe i pandehuri V.H., i cili ka kërkuar ndihmë mjekësore në QKUK, në Prishtinë.
Të pandehurit e sipërshënuar me urdhër të prokurorit të shtetit gjenden nën masën e ndalimit 48 orësh.
Kryetari i Komunës së Gjilanit, Lutfi Haziri, ka thënë se është tronditur pas aktit të vrasjes së një personi dhe të plagosjes së një tjetri në Gjilan, gjatë ditës së hënë. Përmes një reagimi, Haziri ka kërkuar nga organet e drejtësisë që ta zbardhin këtë rast deri në fund. /abcnews.al/
